الدكتورة مها عبد الفتاح تكتب .. جاي رايح منه له
من فضل الله علينا أن وهب لنا النيل فهل نحن نحافظ على هبه الله لنا ؟ ،كنا ندعوا بعضنا البعض ماتيجي نقعد شويه على النيل نشم هواء جميل مع الأهل والأصحاب الطيبين ناكل ذره مشوى وحمص الشام ونحلى بالتين الشوكى وخد الجميل وأهم من ده كله ننظف اماكنا وإحنا ماشيين دى مصر جميله بأهلها وناسها الطيبين اللى بلادهم نن عينهم وليلها كحل العين ٠
طبعا أنت عارف ان أكلك وشربك وحياتك كلها من مياه النيل ،تعالوا نشوف مصدرالمياه اللى بنشربها وبنستخدمها في طعامنا نبدأ من أسره قاعده تأكل وتشرب وبعد كده يرموا مخلفات اكلهم وشربهم في النيل ، ودى ست قاعده بتغسل مواعينها بجوارها راجل بيحمى حماره وجاموسته ،وآخر بيرمى حيواناته الميته في النيل ،غير مياه الصرف الصحي ورمى مخلفات تجريف الأراضى الزراعية ، و المصانع والبواخر والسفن ،تخيل بعد ذالك انك،تشرب من تلك المياه هاترجع ليك ولاولادك ومايترتب عليها من انتشار الأوبئة والأمراض الفيروسيه c، d، a ، بخلاف الفشل الكلوي ، البلهارسيا .
ياريت يتم تطبيق قانون حازم لمن تسول له نفسه التعدى علي نهر النيل والابلاغ الفورى عن أي مخالفة فى هذا الصدد أما عن دور الدوله فيتمثل في معاقبة أى مصنع يلقى بكيماوياته فى نهر النيل .
إصدار تشريع رادع لكل من يلقى بالحيوانات النافقة فى نهر النيل بحيث يكون عمدة القرية مسئول مسئوليه تضامنيه مع الذين يقومون بمثل هذه التصرفات من أهل القرية ،أما عن دورنا كمصريين أن نحسن من سلوكنا ونراعى ضمائرنا ولا نلقى باللوم كله على الدوله ٠
وفى النهاية نقف جميعآ أمام قول الله تعالى( اتقوا يوما ترجعون فيه إلى الله ) ٠
