إيمان سراج تكتب .. خطوات سهلة لتكوني هانم

اليك سيدتى خطوات سهلة اذا اتبعتيها ستصبحي هانم ، و لكى تكونى هانم يجب ان تتعرفي على صفة الرقى ، و تعتبر صفة الرقي من السمات المميزة التي ترتبط بأشخاص معينين، وتعني اللباقة والذوق الرفيع والدقة في التصرفات مع الآخرين، وأناقة المظهر والسلوك المهذب ، إضافةً إلى الأسلوب المميز في الحديث وطريقة التعبير والقدرة على التأثير في الآخرين ، مما يجعل هذه الصفات مهمة لأنها تترك أثراً مميزاً لأصحابها عند من يتعاملون معهم وبالتالي فإن فهم المرأة الحقيقي لمعنى الرقي ينعكس إيجاباً على حياتها وعملها وعلاقاتها مع الآخرين ، وتكمن أهمية الرقي في كونه يزيد من ثقة المرأة بنفسها ومن رضاها عن حياتها ويخلق انطباعاً جيداً عنها وعن شخصيتها كما أن تصرفاتها الراقية تسمح للآخرين بتقبلها بسرعة والرغبة في التعامل معها واحترامها وتقديرها

أنت فريدة من نوعك، ولا أحد يشبهك، ولا تقدرين بثمن، ولكي تشعري بالتحسن لا تركزي على أن تصبحي مثالية أو غنية أو مشهورة ،او شبيه لأحد و تغير نفسك لشخص اخر تعتقيدينه الأفضل ، فهذه أمور لن تجعلك أفضل .

تعالى معى في خطوات بسيطة سهلة تزيد مظهرك رقى و تجعلك هانم و ست الهوانم .

1- متهزريش لحد ما تفقدي هيبتك. . أيوه متستغربيش الست لازم يكون ليها هيبة مش اي حد يتجرأ على الهزار معاها .. ولا كل أشكال الهزار تقبله .. وعلى فكرة ده لازم يكون وسط الجنسين مش علشان انتي في قعدة ستات يبقى مافيش حدود.

2- متتكلميش لحد ما اللي قدامك يصدع من تفاصيل كلامك ويشوفها مملة .. خلي كلامك محدد وعزيز زي فاكهة موسمية تروح لها النفس لما تغيب .. ابتعدي عن اللك الغير هادف وخلي كلامك مختصر وفي شكل نقاط مركزة.

3- مش عيب انك متعرفيش حاجات كتير مش مطلوب منك تكوني بنك معلومات .. بس لو اتكلمتي لازم تعرفي الكافي عن الموضوع اللي بتتكلمي فيه .. مش عيب تقولي معرفش .. بس العيب انك تباني ساذجة.

4- متحشريش نفسك في تفاصيل حياة غيرك .. سيبي الحرية للي قدامك انه يقولك اللي هو أو هي عاوزين يقولوه عن نفسهم. . كتير من الأسئلة زي عندك اولاد أو انتي مخطوبة أو بتشتغل ايه اللي تبدو ليكي عادية ممكن تبدو إجاباتها محرجة لغيرك.

5- متنسيش طريقة جلوسك هي ثلث مظهرك .. مش لازم تتعوجي في قعدتك بس دايما خدي بالك من شكلها وعلى فكرة أقل الجلسات رقة هي اللي بتحطي فيها رجل على رجل .. شوفي حاجة تانية أكثر نعومة واناقة خصوصا وسط اصحابك.

6- الست .. ابتسامة .. مش اكتر من ابتسامة .. ولو حكمت يبقى ضحكة صوتها ميعديش ودانك لكن ضحك المعلمين ده وضرب ايدي على ايد اللي جانبي مع الالش ده اختراع ذكوري بحت .

7- مش مهم ابدا تكوني لابسه سنييه أو لبس غالي .. كفاية تكوني بسيطة وريحتك حلوه ووشك صافي ومتجانس ومختاره اكسسوارات مناسبة لوقت خروجك وافتكري أن اصعب انواع الأناقة ابسطها .. اشتغلي على ستايلك كل فترة وعيدي ترتيب أولوياتك فيه.

8- اوعي تتكلمي عن نفسك إلا إذا أطلب منك ده بسؤال مباشر .. لا تعليمك ولا ثقافتك ولا عيلتك ولا محلات الشوبنج بتاعتك تهم حد الا لو سأل عنها .. وياريت الإجابات تكون نبذة مختصرة علشان ميتقالش عليكي محدثة نعمه.

9- كوني لطيفة متستهيفيش رأي حد ولا تغلطي حد الا في إطار ذوق ومجامل بلاش جملة الكلام ده غلط .. ممكن جدا تستبدليها مثلا أن الكلام غير دقيق .. الفرق كبير بين انك صريحة وانك قليلة الذوق.

10- كوني انتي
انتي اللي اشتغلتي عليها وطورتيها و ثقفتيها وعلمتيها. . محدش فينا بيتولد كامل لكن كلنا بنتولد قابلين للتعلم.

11-وأخيرا كوني واثقة من نفسك .. محدش من حقه يقيمك ولكن مراعاتك لأصول اللياقة دي لذاتك انتي ولصورتك انتي الراقية عن نفسك .. الأنوثة بتكمن في الرقي والاخلاق