الاسبونج كيك.. على طريقة الشيف «أحمد فؤاد» .. بالتفصيل

يوجد الكثير من الأشخاص الذين يعشقون تناول الحلويات بشكل شبه دائم، ويمثلون شريحة كبيرة فى المجتمع، لذا تظل الأم أو ربة المنزل تبحث عن أفضل أصناف الحلوى التى يمكن أن تقدمها لأسرتها وتنال إعجابهم، وتعد الكيكة الاسفنجية هي افضل الاختيارات للربات المنزل التي تقدمها لأولادها في الاجازات، ونقدم لكي اليوم طريقة عمل الكيكة الاسفنجية للشيف حسن او طريقة عمل الكيكة الاسفنجية بالكاكاو.

طريقه عمل الاسبونج كيك بالتفصيل

‏‎1- في البدايه الكيكه الاسفنجيه مش بيدخل فى مقاديرها لا زيت ولا زبده ولا لبن ولا عصير
‏‎الكيكه الاسفنجيه مختلفه عن الكيك العادي
‏‎2- جميع المقادير المستخدمه بيض او دقيق لازم لازم تكون بدرجة حرارة الغرفه
‏‎3- لو عاوزه الكيك بنكهه البرتقال ضيفي برش برتقاله على البيض بدل الفانيليا مش عصير البرتقال ولو عاوزه بطعم الفراوله ضيفى روح الفراوله ولكن روح الفواكه بتتضاف بعد اضافه الدقيق لكن برش البرتقال بيكون مع البيض كبديل للفانيليا
‏‎4- الدقيق والنشا والبيكنج باودر اللى هكتبلكم مقاديرهم تحطوهم مع بعض وضرورى جدا جدا تنخلوا الخليط مرتين يعنى حطي البيكنج باودر والنشا على الدقيق وانخليهم سوا ومهم اوي مرتين
‏‎5- مهم اوى ان المقادير تكفي صينيه لان لو الخليط اكبر من نص الصينيه يبقى الكيكه هترتفع وتهبط من النص وهتبقى معجنه
‏‎6- مهم اوى الفرن يتسخن اثناء تحضيرك للكيك ودرجه الحراره لازم تكون متوسطه لانها لو عاليه او منخفضه هتبقى مشكله والكيكه تبوظ اهم حاجه اظبطي الفرن على درجه 180 واقفلي الفرن لحد ما تخلصي الخليط
‏‎واخيراً اللي بيخلى الكيكه مكتومه حاجتين مالهومش تالت الاولى انك مضربتيش البيض المده المحدده له وهى ربع ساعه يكون المضرب شغال بدون انقطاع على اعلى سرعه والتانيه انك مضفتيش الدقيق معلقه معلقه ممكن تكونى ضفتيه مره واحده او كميه كبيره كل مره وده بيخلى الكيكه طالعه زي العيش ومكتومه

‏‎المقادير:
‏‎- طبعا احنا طلعنا البيض والدقيق قبل العمل بنص ساعه واول ما نبدا نشتغل نسخن الفرن ونجيب الصينيه ندهنها سمنه وبعدين نحط فيها دقيق اكيد انتوا فاهمين العمليه دي.
‏‎المقادير ودي انا معرفش حتناسبك ولا لا بس عموما وانتى بتصبى الخليط فى الصينيه بتاعتك وطبعاً انا معرفش مقاسها يبقى عموما اي خليط لازم يوصل لمنتصف الصينيه لو لقيتى لسه عندك خليط ممكن تحطيه فى صينيه تانيه اهم حاجه للكيك الاسفنجي ان الخليط ميزدش عن نص الصينيه لانه هيرتفع.
‏‎- الكوب المستخدم للدقيق لازم يكون هو هو اللي هتقيسي بيه السكر والنشا
- ‏‎6 بيضات بدرجه حرارة الغرفه
‏- ‎كوب دقيق
‏‎- كوب الا ربع سكر ناعم
‏‎- ربع كوب نشا
‏- ‎ملعقه كبيره ممسوحه بيكنج باودر
‏‎- ملعقه كبيره ممسوحه فانيليا

‏خطوات التحضير:
‏‎سخني الفرن وبعدين حطي البيض وعليه الفانيليا او بشر البرتقال وعلى اعلى سرعه اضربى البيض والفانيليا لمدة دقيقتين وبعدين متفصليش الكهربا عن المضرب وهو شغال بعد الدقيقتين ضيفى السكر مره واحده واحسبى حوالى ربع ساعه على اعلى سرعه فى البدايه هتلاقي المزيج عباره عن رغاوي لكن بعد كده هتلاقي المزيج بقى كريمه وحجمها بقى 3 اضعاف حجم البيض في الاول لازم يبقى الحجم تضاعف لاننا عاوزين الهوا اللى خلى البيض ينتفخ اول ما تلاقي الخليط تضاعف بعد الربع ساعه شيلى المضرب خالص ومتستخدميهوش تاني فيه ناس بتحط الدقيق وتشغل على اقل سرعه وده غلط جدا جدا الطريقه دى هتخلي الهوا اللى نفخ البيض يخرج تانى ومش هتبقى هشه ابدا
‏‎باستخدام معلقه خشب ضيفي معلقة دقيق واحده وقلبي ببطء جدا فى اتجاه واحد اوعي تغيري الاتجاه او تقلبيها من تحت لفوق وافضلى ضيفى ملعقه دقيق وقلبى مرتين وضيفى المعلقه التانيه وبرضه قلبي تقلبتين بشويش وبراحه جدا لازم يفضل الخليط مرتفع لحد ما تخلص ممكن هنا تضيفى روح الفاكهه لو عوزاها بالفراوله او الاناناس بعد ما تخلصي صبي الخليط بشويش وبمنتى البطء فى الصينيه ودخليها الفرن 30-40 دقيقه وبعد اختبريها بعود خشب لو استوت طفي النارعليها واوعي تخرجيها من الفرن خليها جواه لانها لو خرجت وهى سخنه هتتعرض لهوا بارد وهتبوظ سبيها فى الفرن بعد ما تقفليه تلت ساعه تقريبا وبعدين خرجيها.
‏‎ان شاء الله لو طبقتي كل معلومه وطريقه انا كاتبها هتلاقي احلى كيكه اسفنجيه عملتيها في حياتك
‏‎ ثم تحشيها بين كل طبقه كريمه او صوص فراوله وزينيها بالطريقه اللي تعجبك ولو مستعجله وعوزاها فى نفس اليوم ممكن تحطيها في التلاجه 3 ساعات مثلا بس اوعي تحطيها فى التلاجه بعد ما تطلع من الفرن.

وصفات قد تهمك:

كيكه الشاتوه على طريقة الشيف ”احمد فؤاد” أضغط هنا

طريقه عمل دبابيس الفراخ المقرمشة مع الشيف «أحمد فؤاد» أضغط هنا