سوسن بدر: كل لحظة بفكر في الاعتزال ومحضرة نفسي نفسيا
كشفت الفنانة سوسن بدر عن تفكيرها الدائم في اعتزال الفن، مشيرة إلى أن فكرة الابتعاد عن الساحة الفنية تراودها بشكل يومي، وذلك رغم انشغالها حاليًا بتصوير عدد من الأعمال الفنية، كما تحدثت عن لقب «النجمة»، مؤكدة أنها تفضل أن يُطلق عليها لقب الفنانة أو الممثلة، وذلك خلال تصريحات تلفزيونية لها.
وقالت سوسن بدر: "كلمة نجمة ليا أنا، مش عارفة ليه بفضل يتقال عني الفنانة أو الممثلة، لأن بحس أن دي مهنتي ممثلة، ومن خلال هذه المهنة اقدر اعمل حاجات مهمة للناس والفن والمجتمع وده أقرب إلى قلبي، وأعتقد أن مهنة الفن وفيه للي يفهمها صح، ويارب أكون فهمتها صح".
وتابعت: "أتمنى حياتي متبقاش متوقفة على كم اللمبات اللي منورة حواليا، ومتبقاش سعادتي متوقفة على كام مرة تليفوني بيرن علشان صحفي عايز مني خبر أو منتج بيكلمني في شغل أو معجب بيقولي قد إيه هو معجب بيا، لأن بعد شوية اللمبات دي هتطفي واحدة ورا التانية، والموبايل هيبطل يرن كتير كده، والناس اللي في الشارع بتتصور معايا هيقلوا، واعتقد إني محضرة نفسي للمرحلة دي نفسيًا".
وأكملت: "أنا سعيدة إني محضرة نفسي نفسيًا، وبطلب من ربنا أنه يديني القوة أفضل واقفة على رجلي لغاية آخر لحظة وأنا بشتغل، وأنا كل لحظة بفكر في الاعتزال وبعد كده بنزل أشتغل، وعمري ما رحت الاستوديو وأنا مش محضرة مهما كنت زهقانة".
