مدحت العدل لـ معكم: اتولدت عشان أعمل ميوزيكال وأم كلثوم أكثر عمل كتبته بشغف
قال المنتج والسيناريست مدحت العدل، إن اختيار فريق عمل مسرحية "أم كلثوم" تم بطريقة علمية دقيقة، مؤكدًا أن كل خطوة في المشروع خضعت لدراسة ومنهج واضح، لافتا إلى أن لجنة اختيار الأصوات ضمت أساتذة متخصصين في الفوكاليز لضمان الدقة في الانتقاء.
وأوضح العدل في لقائه مع الإعلامية منى الشاذلي ببرنامج "معكم" الذي يذاع عبر قناة ON بالقول: "كنت واحد من اللي اختاروا الأصوات، لكن معايا اثنين دكاترة فوكاليز اختاروا معايا، وأحيانًا كان يعجبنا صوت، فترد الدكتورة جيهان الناصر تقول لأ دي على المسرح هتتكشف، فكل حاجة كانت معمولة بشكل مدروس ومنهجي."
وأشار العدل، إلى أن الفريق استعان بطلاب من معاهد متخصصة لاكتشاف المواهب الحقيقية، وقال: "إحنا جبنا من معاهد متخصصة عشان نحصر الاختيار في ناس بالفعل موهوبين. اخترنا أنسب ناس مش أحسن ناس"، وتابع: "العرض تميز بشغف المشاركين فيه منذ البروفات وحتى العرض، وروح الحماس ظلت حاضرة رغم طول فترة التحضير".
وقال العدل إن قراره بإنتاج ميوزيكال عن أم كلثوم جاء بدافع شخصي وفني، وأضاف: "كان في شغف زي أول يوم، بروفات استمرت ست أو سبع شهور، وكلهم كانوا فرحانين بنفس الحماس اللي حضرتك شوفتيه، وأنا عشقت الميوزيكال، وحاسس إني اتولدت عشان أشتغل ميوزيكال، لأني شاعر وبتاع دراما، فربنا كان محوشني للحتة دي."
وأردف مدحت العدل: استقريت على فكرة أم كلثوم بعد اقتراح من فريق شركته ماد سوليوشن بمناسبة مرور 50 عامًا على رحيلها، قلت لهم أنا هعمل عن أم كلثوم. وأنا ماشي كتبت قصيدة اسمها (صوت الست)، وكنت ناوي أعمل فويس أوفر بقصائد وسط المسرحية، لكن قررت أشيلها علشان الإيقاع ما يقلش، وهصدرها في كتاب قريب."
وتابع العدل قائلاً: "على كثرة ما كتبت، والحمد لله نجحت في حاجات كتيرة، لكن أجمل وأكثر الأعمال اللي كتبتها بشغف يفوق الوصف هي مسرحية أم كلثوم".
