خبيرة: 70% من العلاقات تفشل بسبب السوشيال ميديا.. والتفاهم أهم من الحب
أكدت الدكتورة شيماء طلخان، استشارى العلاقات الأسرية، أن التغيرات المجتمعية المتسارعة وانتشار السوشيال ميديا أثرت بشكل كبير على طبيعة العلاقات الزوجية، مشيرة إلى أن كثيرًا من الزيجات الحديثة تفشل بسبب التوقعات غير الواقعية التى يكوّنها الطرفان قبل الزواج.
وقالت استشارى العلاقات الأسرية، خلال حوار مع الإعلامية مروة شتلة، ببرنامج "البيت"، المذاع على قناة الناس، اليوم الثلاثاء: "زمان كانت البيوت أكثر استقرارًا حتى مع وجود بعض المنغصات، وكان الأهل بيتحملوا عشان خاطر الأولاد والأسرة، أما دلوقتى، بقى فى صورة فيك لحياة مثالية بيرسمها السوشيال ميديا وبيصدقها الناس، وده سبب كبير فى انهيار العلاقات".
وأوضحت أن مقارنة الحياة الواقعية بتلك الصور المثالية التى تُعرض على الإنترنت تؤدى إلى الإحباط والاكتئاب، قائلة: "السوشيال ميديا بتعرض حياة غير حقيقية، فيديوهات معمولة بسيناريوهات وتمثيل مش واقعى، لما الشباب يتفرجوا على ده، بيصدقوا أن دى الحياة الطبيعية، وده مش بس بيصدمهم وقت الجواز، لكن بيخليهم كمان يقارنوا حياتهم طوال الوقت بحياة الآخرين".
وأضافت: "النهارده بنت وولد قبل الجواز بيتخيلوا حياة كلها سفر وهدايا ومفاجآت، وده طبعًا خيال مش واقع، لما يبدأوا يشوفوا الحياة الحقيقة – الشغل، المسؤوليات، المصاريف – بيحصل صدمة، وده بيؤدى لفجوة كبيرة".
وتابعت: "دراسات كتير أثبتت أن حوالى 70% من العلاقات اللى بتفشل بيكون السبب فيها هو التوقعات المبالغ فيها، وده بسبب صورة غير واقعية للحب والزواج سواء من السوشيال ميديا أو من الأفلام، أو حتى من تجارب الطفولة اللى شافوا فيها خلافات أو انفصال بين الأهل".
وأكدت أن التفاهم هو أساس أى علاقة ناجحة، قائلة: "قالوا زمان جملة عظيمة: مش مهم تحبينى، المهم تفهمينى، ودى جملة حقيقية جدًا، الحب هو الروح، لكن التفاهم هو الجسد، والروح ما تقدرش تعيش من غير جسد، لازم يكون فيه عمود فقرى للحياة، وهو التفاهم وتحمل المسؤولية، وبعدها نحط الروح – الحب والمودة".
