الدكتورة غادة صقر تكتب : أحذر من محضر الاكتئاب

20 مارس اليوم العالمى للسعادة، لازم يكون فيه الكل سعيد، واللي مش قادر يفرح معرض لة تحرير "محضر اكتئاب" فورًا! يوم السعادة العالمي هو فرصة نسيب فيها الهموم ونجدد فيها طاقتنا ونستقبل البهجة بقلوب مفتوحة وأرواح مرحة.

وعشان نبدأ اليوم ده بحالة مزاجية عالية، لازم نفتكر الأغنية الخفيفة والمرحة للمطربة الجميلة ليلى مراد اللي بتقول: "مسا الجمال على حبايبنا، يا مسا الجمال، أحلى التمّاسي يا أهل الجمال"، وكأنها بتسلم على الدنيا وعلى كل اللي فيها، تحية حب وود وأمل، الأغنية دي مش بس ذكريات جميلة، لكن فيها سر البهجة اللي بتمس القلب مباشرة، وده اللي خلى لطيفة بعدها ترددها بصوتها الجميل وتعيد لنا الإحساس بنفس الفرحة.

في اليوم العالمي للسعادة، خلينا نعيش على مبدأ "انسى الأسعار وركز في السعادة وعيش اللحظة "، وأوعى تفكر ولو للحظة في الليمون اللي بقى ينافس الدولار ووصل لـ 120 جنيه، أو البانية اللي قررت تدخل نادي الأثرياء وسعرها طار لـ220 جنيه! وحتى الجبنة القريش الفلاحي، اللي كانت رمز البساطة، بقت دلوقتي نجمة بـ100 جنيه، متألقة فى دور الاميرة

ولا ننسى فاتورة الكهرباء اللي بقت أكتر من إيجار الشقة، تخطت الألف جنيه بسهولة! بس ما تشغلش بالك، النهارده يوم السعادة، نركن الهموم على جنب ونقول: "المهم إن النور لسه شغال". ولو الرغيف بقى بـ3 جنيه، نضحك ونقول: "هو إحنا ناقصنا؟ خلي الرغيف يتهنى بالمجد شوية!"

السعادة مش بتستنى الأسعار تهبط ولا الرغيف يرخص، السعادة في إننا نضحك على كل ده ونقول: "الأسعار غالية؟ عادي، المهم إن الضحك لسه مجاني، والدنيا لسه بخير!"

اليوم ده هو يومك إنك تفرح وتعيش اللحظة، وإن كنت ناسي أفكرك على رأى المطربة "هدى سلطان " نصيحة موسيقار الأجيال "محمد عبد الوهاب": "انسى الدنيا وريح بالك، وأوعى تفكر في اللي جرالك "، الحياة قصيرة ومش مستاهلة نضيعها في التفكير في اللي فات، السعادة موجودة هنا والآن، بس محتاجة عينين تشوفها وقلب يحبها.

وزي ما قال العندليب الأسمر "عبد الحليم حافظ " في أغنيته الخالدة: "عيش أيامك عيش لياليك، خلي شبابك يفرح فيك". ما فيش أجمل من إنك تعيش كل لحظة بحب وفرحة، تسعد بيها نفسك وتسعد اللي حواليك،الحياة مش مجرد أيام بنعديها، دي فرص بنستغلها نضحك، نحب، نلعب، ونجدّ، السعادة مش مجرد ضحكة على الشفايف، دي حالة، مزيج بين اللعب والجد، بين الحب والضحك، عشان تعيش حياتك بكامل تفاصيلها.

خلينا في اليوم ده نتعلم سر بسيط: السعادة مش في انتظار إن حاجة عظيمة تحصل، السعادة في إنك تستمتع بالتفاصيل الصغيرة. زي ما ليلى مراد ولطيفة قالوا: "مسا الجمال"، يعني تحية بسيطة ولكن مليانة حب، كفاية إنك تمسى على الناس بابتسامة، كفاية إنك تشارك لحظة جميلة مع اللي بتحبهم، وكده تكتشف إن الدنيا أجمل بكتير مما كنت متخيل.

لو كل واحد قرر النهارده يعيش يومه بحب وفرحة، نتصور هيكون شكل الحياة عامل إزاي؟ كل ضحكة هتتنقل من شخص للتاني، زي عدوى السعادة اللي بتملى الشوارع، تخلي الجو كله خفيف ولطيف، وبدل ما نكون مجهدين من الهموم، نكون متحررين من أي عبء، ونتعامل مع الحياة بروح جديدة مليانة تفاؤل.

أحلى حاجة في اليوم ده إننا ممكن نسمع أغاني بتفكرنا بأوقات جميلة. زي ما " ليلى مراد " قالت "مسا الجمال"، نقدر نفتح الراديو ونغني مع عبد الحليم: "عيش أيامك عيش على طول، خلي شبابك عمره يطول". الأغاني دي مش بس نغمات، دي وصفات سحرية لتجديد الطاقة والروح، لفتح صفحة جديدة مع الحياة.

السعادة مش بتحتاج خطط كبيرة، ممكن تكون في ابتسامة، في كلمة حلوة، في لقاء غير متوقع، أو حتى في كوب شاي دافيء. المهم إنك تستمتع بكل لحظة، وتفتح قلبك لكل جديد، امسك إيد اللي حواليك، وشاركهم فرحتك، زي ما بتشاركهم أحزانك، لأن السعادة أجمل لما تكون جماعية.

وفي اليوم العالمي للسعادة، خلينا نقرر إننا نعيش الحياة بألوانها الحلوة، ونقول لكل اللي بنحبهم: "مسا الجمال على حبايبنا".

وفي يوم زي ده، ما ينفعش ننسى أغنية الشحرورة " صباح " اللي قالت فيها: "قابلت كتير .. فرشولي عشاني الأرض حرير، وشفت كتير .. وما شفتش زي حبيبي أمير"، صباح ببراءة كلماتها، بتفكرنا إن السعادة الحقيقية بتكون مع الشخص اللي بنحبه، اللي مافيش حد يقدر ياخد مكانه في قلوبنا، الحب زي العسل، ما فيش طعم أحلى منه، وده سر البهجة اللي بيسيطر على اليوم ده.

تخيل معايا.. إحساسك لما تلاقي حبيبك في البعد والقرب بنفس الروح، زي ما صباح بتقول: "في البعد عشقاه، في القرب عشقاه، زي العسل على قلبي هواه"، كلمات بسيطة، لكنها مليانة شجن وسعادة في نفس الوقت، وكأن السعادة ما بتكملش إلا لما نعيش حالة حب حقيقية، الحب اللي بنبنيه من صغرنا زي ما صباح غنت: "من حبنا يتعلم الطير مننا الهوى زينا"، وده سر السعادة اللي كل الناس بتدور عليه.

اليوم ده لازم نعيش فيه زي العصافير، نطير ونتنقل بين لحظات الفرحة والحب، نتذكر إن الحياة مش بس ضحك أو لعب، الحياة مزيج بين الجد والحب، وكل ما قلوبنا تفيض حبًا، تزداد حياتنا بهجة. زي ما صباح قالت: "لو جابو القمر من العالي العالي.. والنجوم حطوها على شاني.. رح رد وأقول وانا مالي.. ما أقدرش أسيب حبيبي الغالي"، الحب هنا هو سر السعادة، زي العسل اللي بيدوب في قلوبنا ويخلي كل حاجة حوالينا أحلى.

كل ما الدنيا تحاول تسرق منك لحظة سعادة، افتكر إنك تستحق تعيشها بكل تفاصيلها، السعادة ممكن تكون في لحظة بسيطة، زي سماع أغنية بتحبها، أو نظرة حب من اللي غالي عليك. أو حتى في مشاركة لحظة فرح مع حد قريب منك.

وفي اليوم ده، خلينا نتعلم إن السعادة هي قرار، نقرر نعيش بروح مرحة، نقرر نغني زي صباح،والعندليب ،وعبد الوهاب ، وليلى مراد ، ولطيفة ، نقرر نكون سعداء، الحياة مش هتديك السعادة على طبق من ذهب، لكن أنت اللي ممكن تخلقها بأبسط الأشياء، خلينا نقول بصوت واحد: "مسا الجمال على حبايبنا"، وندعي لكل الناس بالسعادة اللي تملأ قلوبهم وتخلّي حياتهم أحلى، زي العسل!وإما فى إنتظارك محضر إكتئاب .

كاتب المقال الدكتورة غادة صقر استاذ الاعلام بجامعة دمياط وعضو مجلس النواب السابق