ملحن أغنية «كدابة» لـ حسام حبيب يرد على اتهامات اقتباسها: أنا مسروق
رد الملحن والموزع إسلام رفعت على اتهامات المنتج والموزع محمد شفيق حول اقتباس الأول مذهب أغنية "كذابة"، من أغنية قدمها مؤخرا مطرب صاعد يدعى محمود عز من إنتاج شفيق.
نشر إسلام رفعت فيديوهات يثبت بها أنه هو صاحب اللحن الأصلي لأغنية "كدابة" التي قدمها حسام حبيب مؤخرا، مشيرا إلى أنه تم سرقة موسيقاه
وعلق إسلام رفعت عبر حسابه الرسمي بموقع Facebook كاتباً .. انا مكنتش هرد .. بس مضطر أرد لأن اللي بيحصل دة قلة أدب و تطاول، لسه جايلي تليفون دلوقت من صديق ليا بيقول اني في حد كاتب بوست اني واخد لحن أغنية حسام حبيب من أغنية لمغني أنا أعرفه معرفة شخصية واشتغلت معاه بالفعل وعلاقتي بيه أنه مغني، وأنا ملحن وموزع يعني واضح مين اللي بيسمع من التاني".
وتابع إسلام رفعت: أولا مستحيل مستحيل مستحيل أنا اللي بقول إنه يكون توارد أفكار أو خواطر أو نغمات، أنا مسروق بالمللي وبالهارموني حتى، هو برافو عليه محاولة حلوة منه إنه ينط علي بروباجندا حسام حبيب ويحاول نجيب سيرته ويمكن تصيب معاه .. بس أنا هخليها تصيب معاه إنه يتشهر بأنه غير أمين ومعندوش ضمير نهائي.
وأضاف: كل الناس عارفيني كويس وعارفين شخصيتي إني عمري ما أعمل حاجه "بالخسة دي" او بالسذاجة دي!! إني آخد حاجه إبداعية في أكتر حاجه بحبها وهي الموسيقي من حد أو أقتبس جملة من هنا أو من هنا والحمد لله أعمالي كلها بتتكلم عني، الأغنية دي الشاعر عمرو المصري بعتلي كلامها من شهر مايو ٢٠٢٣ اللي فات تقريبا وأنا لحنت الكلام وعملت شكل ليها وبعتناها لأكتر من مطرب من ضمنهم حسام وبالفعل كانت من نصيبة والأغنية جاهزة من فترة كبيرة جدا ولكن حسام اللي كان بيأخر.. و مرفق في البوست فيديو أنا مصورة بأيدي من الكمبيوتر بتاعي متوثق فية تاريخ الأغنية وصوتي في الديمو.
وتابع: الموزع شفيق كاتب إن أغنيتهم نازلة يوم ١٨/١، وحسام حبيب منزل خبر أغنية كدابة من يوم ٨/١ تقريبا ف اللي هو ازاي يعني وأي حد يقدر يعمل سيرش علي جوجل ويتأكد من صحة كلامي.
واختتم كاتبا: آخر حاجه عايز أقولها إني معايا كل ما يثبت إن اللحن بتاعي من مستندات وإني هتخذ كل الإجراءات القانونية مع أي حد جاب سيرتي أو اتكلم عليا بشكل مسئ وحاول ينط وعايز يتشهر
