باسم يوسف: فيه كنائس في أمريكا بيترفع فيها علم إسرائيل وتستضيف ضباط من تل أبيب
قال الإعلامي باسم يوسف، إن إسرائيل الآن سعيدة للغاية بما يعرف بإنجيل سكوفيلد، مشيرا إلى أن هناك اختراق إسرائيلي مرعب في عدد كبير من الكنائس الأمريكية.
وأضاف، خلال لقائه مع الإعلامي أحمد سالم ببرنامج كلمة أخيرة، الذي يذاع على قناة on: " ممكن تلاقي علم إسرائيل مرفوع جوة الكنايس، وكمان الكنائس دي تستضيف ضباط سابقين في جيش الدفاع الإسرائيلي بيخطبوا".
وتابع: "كل ده من غسيل مخ ممنهج ومستمر، وبيتضمن طبعا فلوس وشتيمة للعرب والمسلمين واننا كفار وهمج، وتمجيد في اليهود انهم شعب الله المختار وجنس سامي عن الباقي، لكن في واحدة من الخطب دي في كنيسة من الكنايس، حطوا خريطة إسرائيل الكبرى، واللي كان بيتكلم بيقول لو حد شغال في الـ un ما يبصش عالخريطة عشان هيجيله جلطة".
وقال: "وبدأ يطلع من الإنجيل اثباتات إن هي دي إسرائيل، وإن ده المستقبل، وانا كنت بتفرج على كل ده، وانا اللي بيجيلي الجلطة".
وتابع: "في فيلم تسجيل على يوتيوب، بيناقش فيه تغلغل الفكر ده جوة المجتمع الأمريكي والكونجرس والجيش الأمريكي، اسمه praying for armageddon، أنا بنصح كل الناس تشوفه، والفيلم ده بيتكلم عن ناس أمريكان عادية جدا، الفيلم ده بيقول ان في دولتين مدعومين من الرب وهما أمريكا وإسرائيل، والسياسيين مش بيخبوا الكلام ده".
وقال الإعلامي باسم يوسف، إن هناك نوعين من الحاخامات، النوع الأول يحمل علم فلسطين، ويرى أن إسرائيل دولة مجرمة، مشيرا إلى أنهم مؤيدين لحقوق الشعب الفلسطيني.
وأضاف: "في حاخام مشهور جدا في أمريكا، بيدي محاضرات للآلاف هنا في أمريكا، وبيقول كلام قذر جدا عن المسيحيين، وفي قساوسة كبار بيبرروا الكلام ده، وبيقولوا اننا لازم نساند إسرائيل لحد ما المسيح يرجع، ورغم كل ده بيقولوا علينا متطرفين".
وقال: "على الأقل المتطرفين اللي عندنا معندهمش سلاح نووي في ايد وشغل pr بمليارات في الإيد التانية".
