الأربعاء 5 أكتوبر 2022 02:13 مـ 10 ربيع أول 1444 هـ
رئيس مجلس الإدارة ورئيس التحريرصالح شلبي
مستشار التحريرمحمود نفادي
بوابة الدولة الاخبارية

هايدى شعراوى تكتب أختاروا صح

هايدى شعراوى
هايدى شعراوى

فى بداية اى علاقة سواء كانت " صداقة ، حب ، شغل ، زواج " او حتى علاقة عابرة بتبقى مشاعرنا لسه مش مترتبة و لسه مش عارفين مصدرها صادقة ولا لسه محتاجه شوية وقت علشان تبنى العلاقة على اساس و مشاعر قوية..عشان كدة أنا بنصحكم أختاروا صح

اختار صح عشان تعرف تكمّل، تعرف تواجه الدُنيا بكل متاعبها وانت واقف على أرض صلبة؛ اختار صح لأن دي فُرصتك الوحيدة في حياتك في الإختيار، اختار اللي تعرف ترمي علي كتفهُ همومك من غير لا يشتكي ولا يملّ، اللّي ينفع يبقى وطن مش مُجرد تابع لأهوائك، اللي نسي بيك كل اللى عرفهم قبلك و يمسح بأستيكة أي حد بعدك؛ اللي في وجوده يكون لك وطن و في غيابك جبَل ما تحركوش نظرة ولا تأسره كلمة ولا تغيّره روح ...اختار اللي يتحمّل صدمات العالم في سبيلك .. اختار صح واتشرف ب اختيارك ده قدام العالم كله

ما تجازفش في علاقة تهدّ حيلك.. اختار اللي يبنيك مش اللي يهد فيك ...اختار صح عشان تعرف تعيش

عارف لما تختار حد صح هتتقبل أى شىء من الطرف التانى هتعديله حاجات كتير قوى, الحياة هتبقى أسهل بكتير , وفيها أمان ملوش حدود علشان كده لازم شوية اساس و قواعد لازم تاخدوا بالكوا و انتو بتبنوا اى علاقة ....

اختاروا صح ...اختاروا الى يقف معاكوا فى المرة قبل الحلوة مش وقت الحلوة بس و قت المرة يبقى فى المشمش و يعمل نفسه من بنها ولا بلاش بنها لحسن حد يزعل منى ..

اختاروا الى يحتويكوا الى يسندكوا وقت الضعف و يبقى ظهر ليكم .. اختاروا الى يشوفكوا كل يوم أحسن حد فى الدنيا برغم العيوب الى فيكوا ...

أختارى اللى يشوفك كل يوم أحلى " بنت وست" .... اختار اللي تشوفك كل يوم أحلى "راجل" ... اختاروا الى لو عدا بيكوا الزمن و بصيتوا فى المرايا و شوفتوا تجعيد وشكوا هتفضلوا فى نظر بعض أجمل اتنين ..

اختاروا اللى يبقى مقتنع بيك انت بكل تفصيلة فيك مش شكلك ولا وضعك الاجتماعى ولا عربيتك ولا فلوسك المهم عندوا انت بس ..

اختارو اللي هيروح معاكم للدكتور بعد 30 سنة جواز وهو مخضوض بجد مش جاي مقريف ... اختاروا اللى يناسب روحكوا مش شكلكوا الى تقدره تعيشوا معاه مهما كانت الظروف و الرضى بكل الاحوال ...

اختاروا اللى يفضل معاكوا ميسبكوش فى نص الطريق ...اختاروا اللى يستحق انكوا تعفره علشانه مهما كانت الظروف و الصعوبات ...

اختاروا اللى يقدر خوفكوا عليه وعتابكوا ليه مش من اى تلكيكه يسيبك لانه لقى حد تانى ف حياته ...اختاروا ناس متملش ومتبعدش...

اختاروا الصحاب ..السند ..العشرة .. لما تيجوا تختاروا ناس اختاروا الناس الـ فكرها وعقلها يشبة تفكيركم .. إختاروا الناس اللى بينكم وبينهم حاجات كتير مشتركة.. ولو من وجهة الناس عادية .

لما تختار اختار الي يهتم بيك مش الي يحبك بس اختار الي يقدرك

مش كل حاجة الفلوس إحساسك بالأمان أهم من الفلوس بكتير.. السعادة بالرضا مش بالفلوس.. شوف اللى يسعدك واتمسك بيه.. السعاده مش في قيمه المكان الي انت فيه ولا في قيمه الفلوس الي معاك السعاده في اللمه الحلوه

لان اللمه الحلوه هي الي هتخلي المكان ليه قيمه ..السعاده في ضحكه حلوه مع ناس بتحبها ..السعادة حاجه بسيطه جدا بس لو انت عايزها بسيطه..عشان تكون سعيد مش لازم يكون معاك فلوس كتيير ولا لازم تكون رايح مكان شيك وغالي

بس الي لازم تعمله انك تختار صحبه حلوه عشان هي الي هتخليك سعيد وفي كمان حاجه لازم تكون مقرر من جواك انك تبقي سعيد رغم كل الي بتمر بيه السعاده بسطيه جدا

خليك بسيط هتكون سعيد

إختاروا الناس الى أسمكم محور دعواتهم في كل صلاة وعند كل أذان .. أختاروا ناس بتحب الحب وتقدرة .. ناس تفهم معنى أي شعور .. ويعنى إية مرحلة صعبة.. ناس فاهمة ومخططة لحياتها وحياتكم مش ناس ضايعة ومعاها شوية فلوس