براءة عادل إمام من واقعة طرد ممثل من مسرحية بودى جارد ”علشان بيضحك أكتر منه”

لسنوات طويلة ظل واحد من الممثلين المشاركين في مسرحية بودي جارد في أغلب البرامج التي يظهر بها، يقول إن الزعيم عادل إمام طرده من المسرحية "علشان بيضحك أكتر منه"، وبعد أكثر من 25 عاما، برأ الفنان شريف إدريس الزعيم عادل إماموحكى الواقعة الحقيقية.

وكتب شريف إدريس على حسابه بموقع فيس بوك، "فيه ممثل زميل كبير سناً.. بقاله فترة طويلة جدا كل ما يطلع في لقاء يقول إن الأستاذ عادل امام مشاه من مسرحية بودي جارد علشان كان بيضحك أكتر منه.. طيب لأول مرة هحكي الواقعة اللي حضرها ناس كتير عايشين معانا في الدنيا.. في واحدة من ليالي العرض الجميلة الأستاذ الزميل الممثل كتب رقمه فى ورقه وحدفه لواحدة معجبة فى الصالة أثناء تحية العرض.. شافه حد من بتوع أمن المسرح وراح بلغ الأستاذ عادل إمام.. تاني يوم كان استاذ عادل قبل العرض بيقعد يوميا في الأوضة إللي بقعد فيها أنا وزمايلي الممثلين.. بنقعد ندردش شوية قبل العرض.. وفجأة الاستاذ الزميل دخل من باب المسرح ومعاه واحدة غريبة وفى حالة لا يرثي لها هما الاتنين.. فالاستاذ عادل نده مساعده وقاله مين دي وعرف إنها نفس الشخصية اللى اتحدف لها الرقم فبعت جابه وقام معاه بالواجب.. وطبعا استاذ عادل أخد موقف في لحظتها ودى كانت آخر ليلة عرض لهذا الزميل الممثل فى مسرحية بودي جارد.. أنا أول مرة أحكي الواقعة بس حقيقي الوضع بقي مستفز وياريت الاستاذ الزميل الممثل يحترم سنه وعيب إنه يطلع يكذب علي الناس عيب بجد وياريت لو سمحتم لو أي حد يعرف اسمه بلاش يذكره في التعليقات نهائى".