الفنانة نانسى هلال لـ”الستات”: مسلسل ”ما تراه ليس كما يبدو” تجربة جديدة
استضاف برنامج "الستات مايعرفوش يكدبوا" المذاع على قناة سى بى سى، الفنانة نانسى هلال بعد تألقها فى مسلسل "ما تراه ليس كما يبدو".
وقالت نانسى هلال:" حبى للفن بدأ من تشجيع ماما لأنها بتحب الفن، واحنا فى البيت طول الوقت بنتفرج على الأفلام الأبيض والأسود وماما بتحب عبد الحليم حافظ وأم كلثوم وبتعشق وردة، وبعدها التحق بالجامعة والمسرح".
أضافت نانسى هلال:"مكنتش شاطرة فى المدرسة، وحصلت على 93% فى الثانوية العامة، ووالدى هو اللى شجعنى علشان أذاكر فى الثانوية".
ولفتت نانسى هلال إلى أن فكرة مسلسل "ما تراه ليس كما يبدو" كانت بالنسبة ليا جديدة ومرعبة وأول مرة أشوف حاجة جريئة وأفكار مش بنطرقها وبنتكلم فيها، ولما عرفت فكرة المسلسل تحمست بشكل كبير، وانا بحب النوع ده من المسلسلات، وكنت سعيدة بيه والمسلسل كان عاوز تركيز كبير".
تابعت نانسى هلال :"فى البداية مكنش ليا علاقة بالتمثيل ومكنتش أعرف أمثل، وأول شىء دخلت مسابقة الجمال فى عمر الـ 18 سنة، وأصحابى هما اللى شجعونى وأهلوا رفضوا فى البداية لكن بشرط الحصول على مجموع كبير فى الثانوية العامة، وبعدها دخلت المسرح فى الجامعة وكسر عندى حاجز الخوف والخجل والكسوف ودى كانت أول بداية التمثيل".
