تفاصيل استبعاد حسن شاكوش من فيلم ”الغربان”

كشف الفنان حسن شاكوش تفاصيل ترشيحه لبطولة فيلم سينمائي يحمل اسم "الغربان"، وقيامه بتصوير عدد من المشاهد في سيوة، قبل أن يفاجأ بترشيح نجم آخر ليحل محله.

وقال حسن شاكوش خلال حواره مع الإعلامي عبد العزيز أحمد في برنامج "بالمايك والقلم": دي حاجة مفيش حد يعرفها، من حوالي 3 سنين كلمتني شركة بدون ذكر أسماء ومضيت فيلم بطولة اسمه الغربان وأخذت عربون، وقعدت 3 شهور أتمرن مع كلب المفروض يطلع في الفيلم على إنه ديب بيهجم عليا في الصحرا وبعدها يبقى صاحبي، وإتمرنت مع حصان وفي الجيم".

أضاف: "صورت حوالي 5 أيام في سيوة ومدينة الإنتاج الإعلامي، والملابس جهزت وكل حاجة وعملت برومو الفيلم، وكان المفروض نصور في روسيا لأن الفيلم محتاج تلج".

وتابع: "تفاجأت بناس كلمتني وقالت الفيلم رشحوا له نجم ثاني ومش هينفع أقول الاسم، والشركة ولا اعتذرت وكإني كنت بالنسبة لهم هوا ومش موجود"

وأكد حسن شاكوش استياءه من تجاهله من قبل جهة إنتاج الفيلم قائلا: "لغيت شغل 3 شهور علشان الفيلم وصورت حاجات، وكل ده تبخر في ثانية، ومعايا صور وفيديوهات هبتدي أنزلها الأيام الجاية، وكان معايا في الفيلم الفنانة عائشة بن أحمد ونجوم كتير شاهدين على الكلام ده