تامر مجدي يوجهه رسالة غامضة لأحد الأبطال .
كتب النجم تامر مجدى عبر موقع التواصل الإجتماعي الخاص به فيسبوك ، رسالة غامضه معبراً عن غضبه تجاه أحد أبطال الصف الأول ، ينقد فيه تصرفاته تجاه الفنانين ، و غروره في تعاملاته .
نصت الرسالة المكتوبه على موقع التواصل الاجتماعي فيسبوك على الاتى: " الواحد بيشوف ف شغلتنه دي العجب
واحد مريض عايش ينتقم من الناس ومن زمايله واساتذته لمجرد أن كان ف خلافات قديمة بينهم..مره يجيب ممثل معاه عشان يضربه ف مسلسل !ومره يجيب مخرج يقوله هنعمل مسلسل مع بعض وبعد كده يخلي مدير أعماله يقوله النجم مش فاضي يقابلك ! ومرة يجيب ممثلة نجمة معاه ويصغر دورها ويهمشها ومره يجيب ممثل كبير ويحطه بشكل مش كويس علي التتر وغيره وغيره وماشي يخبط ويجرح ويضايق ف الناس لمجرد أن وصل ل حته أنه العمل بيتباع ب اسمه !! هل ده طبيعي ..مستحيل ...لكن في نموذج تاني ونذكر أسمه زي الاستاذ #كريم_عبد_العزيز وقف جنب النجم #محمد_رجب ف بدايته وده علي لسان محمد رجب انه رشحه وصاحبه وبقا يروح معاه أثناء التصوير ف عربيته يوصله لحد بيته ! راجل بيحب الناس وبيحب شغله بيشتغل في صمت وبينجح نجاح استثنائي محقق اعلي إيرادات ف تاريخ السينما وملوش فيلم او مسلسل وقع أو محققش نجاح عظيم ...المجال الفني فيه الخير وفيه الشر ...بس الاكيد أن الشر مهما عمل هيعيش مكروه و تعيس حتي لو حاول يثبت للعالم أنه سعيد ونهايته سيئه لان الي بيدوم والي بيعيش هو الخير ..انا اتربيت علي مدرسة النجم كريم عبد العزيز ب فنه وأخلاقه ونجاحه ..انا اول فيلم دخلته ف حياتي هو فيلم #حرامية_في_كجي_٢ .
الراجل ده بعد مسلسل الاختيار اتكلم عني بشكل افتخر بيه وطلبني ف الجزء التاني لكن محصلش نصيب لأن شخصية علي علي مينفعش اقدم شخصية تانيه بعدها ف اي جزء من الأجزاء ولكن دعمه وطلبه ليا بالاسم ده فرحني لاني عيشت وحبيت السينما بسببه ...أتمني أن كل زمايلنا يتبعوا المدرسة دي وميتصابوش بمرض النجوميه الي أصاب أحدهم ..الفن متعه وابداع ورسالة و قدوة وكتير اوي مينفعش تتلوث بالافكار والنفوس الشيطانيه..احنا محتاجين نفرح لبعض وندعم بعض ونقدم الخير لبعض..احنا عايشين العمر ده مره واحده والرحلة صعبه وياريت منصعبهاش علي بعض ..الفن رحلة مش حرب ..انا حبيت اقول الكلمتين دول يمكن يلفتوا انتباه حد وربنا يوفقنا كلنا ونحقق كل الي نفسنا فيه ونقدم فن ممتع للناس واحنا كمان نستمتع بيه ♥️ "
يذكر أن الفنان تامر مجدى حصل على العديد من الجوائز ومنهم أحسن ممثل جمهوريه ثم انتقل إلى مسرح الاكاديميه
وقدم العديد من المسرحيات وحصل من خلال هذه الاعمال ايضا على جائزة احسن ممثل اكثر من مرة
شارك في مسلسل بـ١٠٠وش2020 ، مسلسل بدون ذكر أسماء2013 ، مسلسل موجة حارة2013، مسلسل بين عالمين2017 ،مسلسل الاختيار2020 ، و مسلسل ضرب نار 2023 .
