نهى العمروسي .. أنا متحررة مش منحرفة
ظهرت الفنانة نهى العمروسي، فى لقاء لها مع الإعلامية أميرة بدر في برنامج Vip المذاع على شاشة هي ، و تحدثت عن أول حب في حياتها والتي كانت أثناء مرحلة طفولتها، وذلك مع ابن جيرانها ، و قالت كنت بحب ابن الجيران وكان عندي 3 سنين وصاحبتي كانت بتحبه لأنه كان أمور، وأنا متربية على الحب، وحب الطفولة ده حاجة جميلة.
و تابعت العمروسي حديثها قائلة: أنا متحررة ولست منحرفة، موصلتش في حياتي لـ أني أقول بحب الشخص ده فأروح أعيش معاه، ولكن كنت متصالحة مع الجانب الذكوري بتاعي، أنا عندي صحاب ولاد كتير من وأنا صغيرة ومببقاش مرتاحة لما أحس أن حد بيرسم عليا.
و قالت نهى العمروسي أنا اتعقدت من الرجالة والعلاقات مكنتش موفقة فيها، وأنا اللي أنا فيه حاليًا راحة بالنسبة لي، اختياراتي كانت زي الزفت، ومبقتش اثق في اختياراتي، وكنت تافهة وبحب الرجالة اللي شكلهم حلو، طلعت زكريا قالي خدتي ايه من الرجالة الحلوة بيعيطوكي.
و تابعت أتربيت في بيت عيلة بيت مفتوح و قضيت طفولة سعيدة جدًا ، كنت محظوظة بأني من عيلة عندها وعي ومثقفة وبتشرع قوانين وكنت بسمع مناقشات وأنا صغيرة في السياسة والقوانين، وعندي فيها كل الفئات شيوعيين، ومتدينين أوي، وكل الأفكار كانت بتتقال حوليا.
و استكملت عودوني على القراءة كلهم بيقرأو منهم أختي الكبيرة، ولما كبرت حسيت أنهم كونوا وجداني وخلوا عني وعي، وعديت بحاجات صعبة كتير، وطول عمري مكنتش بتفهم صح ولحد دلوقت دي صعوبتي في المجتمع، يعني مثلا كنت بركب موتسيكلات وأنا عندي 11 سنة، ودايمًا يشوفوني صايعة، وكان عندي موتسيكل وأنا في 3 إعدادي ، قالت جدي وخالي غرسوا فيا حتة الحرية، وميكنش عندي حاجة مقيداني، وعندي حرية الفكر، أنا اللي أحدد حريتي لحد فين، وحرية الفكر غير التصرف، وأنا كسرت الحاجز بتاع المجتمع لما ركبت الموتسيكل.
