الرئيس السيسى: سعر برميل البترول قد يصل لأكثر من 200 دولار بسبب أزمة الحرب

قال الرئيس عبد الفتاح السيسي: "الوكالة الدولية للطاقة قالت إن إحنا دي أزمة قد تكون هي الأكبر في تاريخ الطاقة في العالم الحديث، قد تكون أكبر أزمة في تاريخ العالم الحديث هي أزمة الطاقة اللي إحنا بنواجهها، أو الأزمة الحالية اللي إحنا بنواجهها دلوقتي. وأنا عايز أقول إن هي مش صدمة واحدة، هي صدمتين. هي صدمة النقص، واللي هيترتب عليها صدمة أخرى هي صدمة زيادة الأسعار.

وأضاف الرئيس السيسي خلال كلمته في افتتاح مؤتمر ومعرض مصر الدولى للطاقة: "نقص المعروض اللي الأسواق إحنا بنتكلم على كمية معتبرة جداً 20 إلى 25% من هذه الكميات، يعني كتير من الإمدادات اللي كانت بتتحرك من الخليج سواء كان الغاز أو البترول، حدثت خلال الشهر اللي فات على الأقل أزمة كبيرة جداً في يعني نقلها إلى الأسواق العالمية.

وتابع الرئيس السيسي: "وبالتالي في صدمة كبيرة. لكن الصدمة دي إحنا إلى حد الآن قد لا نكون مستشعرين مدى عمقها، لأن كتير من الدول كان لديها احتياطيات، وأيضاً الاحتياطيات اللي كانت موجودة عندها كانت تقريباً بأسعار كانت معقولة.. وعندما تدخل التعاقدات الجديدة بالأسعار بتاعتها الكبيرة، إذا كنت أنا فاهم الموضوع ده يا كريم كويس ولا لأ.. ده معناه إن الأسعار هتقفز بشكل كبير".

وأكمل الرئيس السيسي: "إذن صدمة النقص، اللي هي وأنا متحسب ليها جداً إن استمرار الحرب أكتر من كده قد.. قد يترتب عليها مش أزمة نقص نتيجة غلق مضيق هرمز فقط، لأ، أنا أخشى إن يترتب على استهداف منشآت الطاقة، سواء كانت الإنتاج أو المصافي اللي موجودة استهدافها كان هيكون ليه تداعيات خطيرة جداً جداً على الاقتصاد العالمي وعلى أسعار الوقود، اللي قد تقفز إلى أكثر من.. يعني في محللين ومراقبين يعتقدوا إن لو هذه المنشآت تعرضت لمشكلة قد يصل يعني سعر برميل البترول لأكثر من 200 دولار.. وده أمر مش مبالغ فيه، وده أمر يعني بيلقي.. بالنسبة لنا هو جرس إنذار لينا كلنا، لكل من هو يتابع هذا الأمر، إنه لازم يعرف إن مهم جداً استعادة الاستقرار في الخليج وإنهاء الحرب في أسرع وقت ممكن".