شيرى عادل: السوشيال ميديا هامة للفنان.. وبستفيد من النقد عليها

أكدت الفنانة شيرى عادل أنها تحترم السوشيال ميديا والآراء عليها بصورة كبيرة، قائلة: "القريبين منك مش هيقولوا رأيهم بصراحة في أدائك على مستوى التمثيل وعلى الأغلب لازم كلامهم يبقى في مجاملة، حتى ولو مش عاجبهم الدور، وعكس ناس كتير بشوف إن السوشيال ميديا والتعليقات عليها مهمة جداً".

وأضافت: "بقرأ التعليقات وبحس إن اللى بينتقد فيها حتى لو كان بشكل لاذع بيكون كلامه حقيقى لأنه مش هيجامل، وبالتالي بهتم بيها جداً".

كانت تطرقت الفنانة شيرى عادل عإلى رأيها في الوصفة السحرية للزواج الناجح قائلة: "مفيش أي وصفة سحرية للزواج الناجح، اللى عايز يكمل بيكمل وده اللى اكتشفته سواء بعد المسلسل أو عقب التجارب اللى اتعلمتها من الحياة".

أضافت شيرى عادل: بدأت أقتنع إن حتى الصحاب نصيحتهم لبعض مش شرط تكون مناسبة لأن كل واحد غير التانى وكل شخص شريك حياته غير الشريك التانى وبالتالي الطريق اللى تمشي مع حد ما تمشيش مع غيره".

أيضًا كشفت الفنانة شيرى عادل عن كواليس مسلسل الحشاشين التي ظهرت خلاله ضيف شرف بدراما رمضان الماضى، وقالت أثناء حلولها ندوة على تليفزيون اليوم السابع: "صحيح ظهرت ضيفة شرف بس حضرت للدور أكتر من مسلسل كامل، وده من كتر الضغط اللى كنت حاسه بيه نظرًا لأسباب عدة منها إن الظهور في الحلقة الأخيرة".

وأضافت: "المسلسل حقق حالة كبيرة من النجاح، وبالتالي حملني ضغط كبير، ثانيًا أنا طالعة فيه بشخصية بنت كريم عبد العزيز ومشهد مؤثر جدًا معاه بعد وصوله لمرحلة مغايرة تمامًا عن اللى سبق ووصل ليها".