رضوى الشربيني: موقف هند صبري من الاستقالة «محترم وشجاع»

علقت الإعلامية رضوى الشربيني، على قرار الفنانة هند صبري بـ استقالتها عن منصبها كسفيرة نوايا حسنة لبرنامج الأغذية العالمي.

وقالت رضوى الشربيني، في برنامجها "هي وبس" عبر شاشة قناة CBC سفرة: "خلال المشوار الطويل طوال الـ 47 يوم لو أنا عديتهم صح، كل واحد فينا كان له موقف مختلف عن الآخر، وكل واحد لينا كان له طريقة في التعبير والاعتراض".

وأضافت: "حد كان بيكتب منشور، حد كان بيتكلم، حد كان بيقطع صور معينة على الهواء، كل واحد كان بيشجوا بطريقة صعبة وقوية، وفيه ناس عملت أكتر من كده بشوية ومنهم الفنانة هند صبري اللي قررت التنحي عن دورها كسفيرة للنوايا الحسنة لبرنامج الأغذية العالمي".

وتابعت رضوى الشربيني عن موقف هند صبري: "موقف محترم وقوي جدًا وشجاع من ست قوية وشجاعة، هند كانت كتبت من أسبوعين كلمتين اتفهموا غلط والناس هاجمتها، والحقيقة أنها كان قصدها حماية المدنيين في غزة، لكن تم فهم المنشور بشكل خاطئ وقالوا عليها كلام غير لائق بالمرة وهند سكتت ومعلقتش كعادتها".

وأكملت: "إمبارح استقالت من منصبها ومش كتير بيعملوا كده وبياخدوا الموقف الحاسم الواضح أمام الناس كلها، برافو هند ونتمنى من كل الناس اللي عندها صوت عالي وشهرة وقوة الكلمة أنها تاخد نفس الطريق ده، الكلمة هتشكل ضغط والضغط ممكن يغير واقع".