بوابة الدولة
الجمعة 20 نوفمبر 2026 05:01 صـ 9 جمادى آخر 1448 هـ
رئيس مجلس الإدارة ورئيس التحريرصالح شلبي
مستشار التحريرمحمود نفادي
بوابة الدولة الاخبارية
هل تواصل الانهيار؟.. آخر تطورات أسعار الذهب اليوم الجمعة 20 نوفمبر 2026 سعر الدولار اليوم الجمعة 20/11/2026 أمام الجنيه المصرى سعر الحديد اليوم الجمعة 20 نوفمبر 2026.. تطورات الأسعار ختام منافسات الدور ربع النهائي ببطولة الصين المفتوحة للاسكواش الاتحاد يواجه الجزيرة بإياب نصف نهائي دورى السلة مصرع فتاة ونجاة شقيقتها إثر سقوطهما في نهر النيل بالعياط القبض على عامل لاتهامه بالاعتداء على قمص كنيسة الملاك والعذراء بالوراق النائب عماد الغنيمي : تكريم الكونجرس الأمريكي للرئيس السادات تقدير عالمي لقائد استعاد الأرض وصنع السلام برؤية استراتيجية أماني خالد تكتب المرأة العاملة بين التمكين والتحطيم اختيار أول مصري لعضوية لجنة تحكيم متحف شيكاغو أثينيوم وجوائزه Good Design® العالمية، لدورتها السادسة والسبعين بالولايات المتحدة الأمريكية مواقيت الصلاة اليوم الجمعة 20 نوفمبر 2026 بمحافظات الجمهورية شبورة صباحية وارتفاع طفيف بالحرارة.. تفاصيل طقس الجمعة 20 نوفمبر 2026

رجب هلال حميدة يكتب.. انا مش خايف على مصر.. خالص فى الازمه الاقتصاديه اللى بيمر بيها العالم

رجب هلال حميدة البرلمانى السابق
رجب هلال حميدة البرلمانى السابق

وهاخاف ازاى وكل بيت فى مصر حرفياً فيه وزيرة إقتصاد، تلاقى الام من دول استاذه فى تحويل الفسيخ لشربات ،احنا فى مصر ما عندناش حاجه بتترمى ولا حاجه بتبوظ ويمكن ده سر البركه والخير اللى دايماً بيوتنا بيه عمرانه .. شوية الفاكهه دى دبلت الحقى لفيهم بشوية سكر واعملى احلى مربى .. طب الخيار ده كرمش وبيحتضر، مافيش مشاكل شوية مايه وملح وارمى فى برطمان هايسترد عافيتو ويبقا بُمب..
اللبن قطع عادى شاشه وصفيه ورشة ملح وقرن فلفل ونعمل احلى جبنه طب والشرش اللى ها ينزل (( نرموه)) ودى تيجى مايبقوش امهات مصريه اصيله ارمى عليه شوية دقيق وحتة قشطه من وش اللبن اللى محوشينه وقرّص وشغّل الفرن ودفِى البيت .
ورق العنب غالى عادى نحشى ورق لفت وورق سلق مع عصرة ليمون ونعمل حلة محشى يحكى ويتحاكى عنها اللى رايح واللى جاى ..((شعب صاحب مزاج اللقمه الناشفه فى بيته خروف ))

طب بذمتكو فى شعب فى العالم اكله محبش وطِعم لوحده كده من غير لحمه ولا فراخ ولا سمك غيرنا رغيف بلدى ملدن صح مع قرصين طعميه وحتة بدنجان بالتوم واحبس بكوباية شاى مغلى سكر منه فيه جوا براد صاج عندنا بالدنيا واللى فيها،، ولا شوية كشرى أصفر معمولين بحب وجمبهم طمطمايه وشوية بدنجان مخللين بالتوم وطبق مخلل وعودين جرجير وبيضتين مدحرجين فى السمنه البلدى( لزوم البروتين)عندنا اجدع مليوون مرّه من خروف ..

ياجماعه وربنا احنا شعب جميل وبيوتنا دافيه وعمرانه واللى زينا عمره ما بيفرق معاه ظروف ولا بتكسره قِلة فلوس وبنقول ((الحمد لله))
الحمد لله علي نعمه وفضله وستره ..
نعيش في مصر وخير مصر..
وستحيا مصر ..

كاتب المقال رجب هلال حميدة البرلمانى السابق ونائب رئيس حزب إرادة جيل وعضو تحالف الاحزاب المصرية

موضوعات متعلقة