شيرين عن حسام حبيب: تعرضت للضرب والسحل وكل أشكال الابتزاز والتنمر
كشفت الفنانة شيرين عبدالوهاب عن تفاصيل صادمة عن حياتها مع طليقها حسام حبيب، وأوضحت أنها عادت له بعد انفصالها بطلقة بائنة منه.
وقالت شيرين عبدالوهاب، خلال مداخلة هاتفية لبرنامج “كلمة أخيرة”، مع الإعلامية لميس الحديدي، المذاع عبر فضائية on e: “حسام حبيب مارس معي كل أشكال الابتزاز مش عاوزني أعمل أي حاجة في حياتي غير أبقى قاعدة قدامه بس”.
وأضافت: "لو رحت عملت حفلة أو فرح ناجح ينكد عليا ويقولي كنتي ماسكة الراجل كده ليه والواد بيعمل معاكي كده ليه؟ أقله ده لو عملت إعلان ناجح زي إعلان بنك مصر وأبقى تريند والناس مبسوطة بيا لازم هو ينكد عليا ويبوظ اليوم".
وتابعت: “تم طلاقنا بعد حلق رأسي وكان طلاقا بائنا وبعد أن هدأت من الكارثة شعرت أني لا أستطيع الاستغناء عنه ولازم أديله فرصة تانية وأن مينفعش نبعد عن بعض بفجر في الخصومة وكنت مؤمنة أن العلاقة مقدسة وكنت بحبه وفاكراه ابني مش جوزي وعملتله استوديو لشغلنا وقمت بشراء كل الأغاني التي أعجبته بشيكات باسمي عشان مترحش منه”.
وكشفت عن تعرضها للتنمر من حسام حبيب قائلة: "بعد ما عمل كل ده ألاقيه بيتهمني ويتنمر عليا ويقولوا تخنتي وبقيتي شبه أمك وأنا عاوز واحدة أتباهى بيها قدام الناس تبقى حلوة ورفيعة وكلام من ده بخلاف الخناقات التي تعرضت فيها للضرب والسحل على الأرض وشتيمة عمر ما في إنسانة تقبلها على نفسها".
جعت له بعد الطلاق بشروط
وواصلت: "لما تم طلاقي رجعتله وأديته فرصة أخرى بشروط وألا يتعرض البنات لحالة نفسية سيئة وكان بيتردد على بيتي عشان فيه استوديو تحت البيت وقتها وبينا شغل وحاولت أهيأ البنات أنه لا زال موجودا لحد ما تلاشت الوعود مجددًا ورجعت المشاكل وقلة الأدب ترجع بلا سبب".
واستطردت: “أنا عندي مشكلة أني لما بتعصب بوصل لمستوى صعب ممكن أذي نفسي ودكتوري اسمه محمود مرسي ممكن تكلموه تسألوه ونصحته بتركي لفترة حتى ولو ربع ساعة أو أني أدخل أوضتي شوية لحد ما أهدى لكن هو أصر في كل خناقة يفضل قدامي يحرق في دمي وأعصابي لحد ما أمسك الماكينة وأحلق شعري”.
وردًا على سؤال الإعلامية لميس الحديدي: “كان عايز يوصل لإيه في الآخر؟”، قالت: “أنا كنت فوق وما زلت وهو كان تحت ولما ماعرفش يطلعلي فوق حاول ينزلني تحت.. وده تحليلي لكل اللي حصل”، واعتذرت لنفسها قائلة: "آسفة على اللي عملته في نفسي وبناتي وجمهوري اللي كان مقتنع أني مش على ما يرام وكنت بطلع أقول كلام غير الحقيقة".
وكشفت عن أنها اتجهت للغناء يوم أن كانت حليقة الرأس حتى لا يصاب بناتها بعقدة قائلة: "طلعت غنيت عشان بناتي مايتعقدوش لأني كنت قرعة".
.jpeg)
