حنان ترك في أول بث مباشر: أنا مش داعية إسلامية وجاهلة سياسيا
خرجت الفنانة حنان ترك على جمهورها من خلال بث مباشر على صفحتها الرسمية بموقع التواصل الإجتماعى "فيس بوك"، وبدات البث المباشر بالحديث عن عدة أمور قائلة: "أنا عندى برد كان المفروض أطلع من أسبوع فات ومحبتش أتاخر عليكوا واستحلمونى واستحملوا صوتى".
وتابعت حنان ترك: "عاوزة أشكركم واشكر أسرتى اللى وقفت جنبى وقت مرضى وكل أصدقائى اللى بيسألوا عليا ودكتور أشرف زكى كان بيكلمنى وبيطمن عليا، وبشكر الجمهور اللى بدعواته الحمد لله بقيت أحسن بكتير وكويسة جدا، ومش عارفة أشكركوا على ايه ولا ايه وسعيدة انى معاكم وانتوا وحشتونى جدا".
وأضافت حنان ترك: "عوزاكم تساعدونى على أى حد بيتكلم باسمى انتوا اللى تقفوا لأنكوا عارفين حنان ممكن تقول ايه ومتقولش ايه، لأن كان في صفحات كتير باسمى بيتكلموا باسمى فى الدين وفى السياسة وانا مليش علاقة بيها وعمرى ما انزل بوستات بالشكل ده".
وأوضحت حنان ترك "أولا سياسيا أنا جاهلة جدا ومعنديش وعى سياسى أنى اعرف أقول اعملوا حاجة او متعملوش ومعنديش الثقافة اللى تخلينى أنظر سياسياً، أما بالنسبة للدين قلتها زمان وهاقولها تانى أنا درست علوم شرعية على سبيل النجاة لا على سبيل الدعاء، والدعوى دى موضوع كبير جدا ومحتاج علم وفقه مش أي حد يقدر يعملها، أنا فين والكلام الكبير ده فين".
وتابعت حنان ترك: "أى حاجة نزلت على لسانى ويقولوا حنان قالت فتوى وإن ربنا غضبان على فلان، أنا مليش علاقة خالص، أنا لا بحرم ولا بحلل ولا الكلام ده له أى علاقة بيا، وأنا مقدرش افتى في دين ربنا، وده له ناسه، ونصيحة لكل الناس، لما تحب تاخد نصيحة خدها من أهل العلم والناس المسؤولين عن الفتوى ومصرح لهم بها".
