منى الشاذلى تتحدث عن أسرتها وبناتها للمرة الأولى مع فاطمة مصطفى
كشفت الإعلامية منى الشاذلى عن حياتها الشخصية للمرة الأولى خلال برنامج حلت فيها ضيفة للمرة الأولى وذلك بصحبة الإعلامية فاطمة مصطفى مقدمة برنامج "الراديو بيضحك" الذى يذاع على راديو 90.90، وقالت إنها أم لثلاثة بنات منهما اثنتين توأم، قائلة: "أنا مش ديمقراطية، لأن في أساسيات، وبشوف إن الأمومة مُقدسة، وشغلى جنب البيت، وممكن أبقى في اجتماع وحالة طوارئ في الشغل، وأقول للى معايا بريك نص ساعة وراجعه، وفى الوقت ده اروح جرى لبناتى، اشوف في إيه حاصل".
وأضافت مقدمة برنامج "معكم": "ممكن أروح علشان في واجب ما اتعملش، في حد راجع من المدرسة بيعيط، فاروحله مش بستنى لبعد التصوير واخلص واروحلهم، لأن الأمومة دي أهم حاجة".
كما تطرقت إلى المطبخ قائلة: "في أكلات كتير بيطلبوها مني، لأن في اساسيات عندنا إن الاكل بيتى، والمطبخ عندنا دايماً عامر، وحاجات بتتعمل طول الوقت، وهو بالنسبة لينا قلب البيت، واجتماعات العيلة بتبقى في المطبخ، وماشيين مع الموسم، يعني في الشتا نجيب الأكل اللى طالع فيه، وهكذا".
