”مي حلمي” في أول ظهور لها بعد الإيقاف

ظهرت الإعلامية مي حلمي في الثانية عشرة منتصف ليل أمس السبت، في برنامجها "الحكم" على قناة "الحدث اليوم"، لأول مرة منذ الإيقاف على خلفية أزمة انسحاب الكابتن أحمد صالح، لاعب الزمالك السابق، من البرنامج؛ حيث استضافت مي، مدرب الزمالك السابق لكرة اليد حسين زكي.

وتحدثت مي حلمي، في مقدمتها عن برنامجها، قائلةً: "حلقة الحَكَم النهارده طبيعي كل الناس عارفة إن هي هتبقى غير، وعشان كده قررت إنها تبقى مع ناس بحبها ومع حد بحبه، بس قبل ما أقول الضيف مين أو قبل ما أقول إيه اللي هيحصل في حلقة النهاره، لازم أحكي حكاية الحَكَم وقد إيه تعبنا فيه.. أما بخصوص اللي فات مش حابة أعلق عليه غير إني ارجع أعيد كواليس الحكم".

وأكدت مي حلمي أن ما يحدث على الشاشة غير الكواليس "اللي ورا الكاميرا"، موضحةً أن الضيف بعدما تنتهي الحلقة بيمشي مبسوط منها حتى لو كانت بها مشاحنات؛ فعلى مدار 3 سنين تلقت آراء العديد منهم، وبعضهم من أصدقائها، فيها كمذيعة؛ منهم رضا سيكا وسيد بازوكا وعبد الشافي صادق، غير الناس اللي غيرت رأيها؛ مثل محمد عبد الجليل ومحمود أبو الدهب وياسر الشنواني وعبد الواحد السيد.

واستعرضت مقدمة "الحَكَم" فيديو لبعض اللاعبين السابقين من ضيوف البرنامج؛ منهم رضا عبد العال، والذي قال فيه: الحلقة عدت على خير بس كانت هتعمل نسبة مشاهدة عالية جدًّا، بينما قال رضا سيكا لاعب الزمالك والإسماعيلي السابق: أنا باشكرك إنك خليتيني أوصل للناس وده جميل عمري ما هانساه، وردت عليه بسؤالها: الناس اللي بتقول إني عنصرية للأهلي بس؟ فرد عليها قائلًا: أنت مش عنصرية؛ لكن أنت بتجيبي كل الناس.

وعلقت مي حلمي على الفيديو، قائلةً: "ده كان رأي لاعيبة كبار لبسوا فانلة وشورت وبيقولوا رأيهم في (الحكم) بعد الحلقة، فأنا سعيدة إن ده كان رأيكم فيّ وسعيدة إني أسمع ده من لاعيبة كبار بعد كل حلقة باعملها، وأنا شايفة إني لسه مذيعة صغيرة؛ لكن سعيدة إن كباتن كبار زي دول بعد ما اعتزلوا أن ييجوا يشرفوني والبرنامج لم يقل، ولكنه ناجح ومفيش حلقة معملتش ضجة، مش عشان بنركب التريند.. بصوا خلينا نتكلم عن كلمة التريند إن مين مابيحبش يعمل ده، لما بيحصل بروباجندا أنا كمذيعة بستغلها لكن مش هقلل من قيمة الشخص أو أذم أو أقول كلمة مش حلوة أو أسب شخصًا لأن الكلمة دي صعبة أوي، لكن هركب التريند برأيي".

واختتمت حلمي مقدمتها بقولها: "بافتخر أن نجومًا كبارًا كانوا ضيوفي وأني عملت برنامج فضل 3 سنين من أول حلقة لآخر حلقة زي ما هو".