الرئيس السيسى: الاكتفاء الذاتى الكامل فكرة صعبة جدا ولازم نفهم الحكاية

أكد الرئيس عبد الفتاح السيسي، أن الكثير من الدول لا يكون عندها اكتفاء ذاتي كامل من المحاصيل الزراعية على الأقل في دولة مثل مصر، متابعا: "مفيش اكتفاء ذاتي لكل المحاصيل.. بتكلم عن بلدنا.. مهما عملت لا يمكن أن نحقق اكتفاء ذاتي.. بتكلم عن الوعي ونعرف ونفهم الحكاية".

وأضاف الرئيس السيسي، خلال كلمته في افتتاح مشروع الدلتا الجديدة التنموي المتكامل: "يعني مش ممكن لو حطيت 2- 3 ملايين فدان زيادة.. فوق اللى موجودين دول.. هل تقدر تحقق اكتفاء ذاتي كامل لـ 110 ملايين إنسان؟!.. أتمني بس ده مش واقعي.. بلاقي مقالة في الجورنال بتتكلم عن الاكتفاء الذاتي.. مش هنقدر نحقق الاكتفاء الذاتي لأني معندناش أراضي ومياه تكفي لكل طلباتنا.. مثال: "عاوز تجيب درة.. علف للماشية وعلف للدواجن.. ملايين الأطنان.. نحتاج 14 – 17 مليون طن سنويا.. جنب القمح جنب ده جنب وغيره من المحاصيل.. مجمل الأراضي على مدار السنة تقدر تلبي الطلب".

وتابع الرئيس السيسي: "لا مفيش اكتفاء ذاتي.. لا ليه علشان نبقي عارفين.. متي نشعر بثمار التنمية؟.. ثمار التنمية عمل دائم.. والتنمية لا تنتهي والطموح لا ينتهي وتستمر الإنجازات والعمل بدون توقف للأجيال الجديدة.. مشروع الدلتا الجديد اللى بنتكلم فيه اتعمل 500 ألف طن صوامع عشان إنتاج القمح اللى يطلع غير اللى قبل كده عشان نحطه في الصوامع دي ثم منتجات أخرى معمولة تطلع من هنا ويتم عمل تصنيع زراعي لها لتعظيم الاستفادة في الصوب الزراعية وأمور كثيرة وأتمنى يكون في فرصة أكثر نتكلم فيها وعنها بتفاصيل كثيرة ولم نتكلم عن المنيا وبني سويف وكومبو وتوشكا وشرق العوينات وهناك في مليون فدان وفي الـ500 ألف فدان اللى في سيناء".

وقال الرئيس السيسي في نهاية كلمته: "إحنا كلامنا قليل وتقديمنا للشغل بتاعنا محتاج مننا عناية أكثر.. لأننا مش قادرين نقول للناس ان دولة فيها أكثر من 100 مليون عشان تلبي مطالبهم في كل شيء ليس بالأمر اليسير.. وهذا ليس معناه إننا كدولة إحنا جزء من البلد والناس واللى بيتعمل فضل كبير من ربنا والله العظيم اللى بيتعمل ما يتعمل إلا بفضل من ربنا".