حسن الرداد ينعى موظفة شابة: مراسى كانت إنسانة عظيمة وفراقها وجع قلبى

نعى الفنان حسن الرداد فتاة كانت تعمل معه، وكتب على صفحة التواصل الاجتماعى قائلا: مع كل الألم والأسف والحزن من كل قلبي بنعي بنت اسمها مراسي، مراسي دي بنت جميلة جداً جداً جداً لسه في مقتبل العمر عندها 21 سنة كانت بتشتغل معانا، لسه متوفية دلوقتى، وأنا بصراحة مش قادر أصدق إني بكتب لها رثاء وفاة.

وأضاف: لكن بكتب علشان أعبر عن امتناني وحبى وتقديرى لها وقد إيه كانت إنسانة جميلة، مؤدبة، محترمة، أمينة وعينيها مليانة.

وتابع: رغم أنها بتشتغل معانا من سنتين بس، لكن تعتبر فترة كبيرة بالعشرة الموجودة، أنا حزين عليها زي ما تكون واحدة من عائلتي بالظبط، واكتشفت إن ساعة الفراق بتحس إن فيه ناس مهمين فى حياتك جدا وممكن يكون مش قريبك وما بيتكلمش نفس لغتك مش من نفس بلدك مش من نفس ديانتك ولا من نفس المستوى الاجتماعى بتاعك، بس بتشتركوا فى إن إنتو الاتنين بنى آدمين.

وقال حسن الرداد أنا حبيت أكتب لها بوست رغم إانه حاجة بسيطة تقديرا لها ولمكانتها، مش لازم تبقى من عيلتى أو شخصية عامة عشان أكتب لها بوست رثاء، هى كانت شخصية بسيطة لكن إنسانة كبيرة وغالية عندنا جدا، قيمة الإنسان من إنسانيته وتأثيره فى الآخرين بأفعاله ومواقفه وأخلاقه العالية الله يرحمها ويصبر أهلها ويصبّرنا، أرجو الدعاء لها بالرحمة والمغفرة.