محمود سعد يكشف آخر التطورات الصحية لأنغام: الأطباء ينصحونها بالمشى فى غرفتها

علق الإعلامى محمود سعد على آخر التطورات الصحية للنجمة أنغام، والتي ما زالت تتلقى العلاج في ألمانيا، بعدما خضعت لعمليتين جراحيتين في البنكرياس، حيث كتب معلقاً: لمحبي أنغام الكتير قوي.. قوي قوي..
هاقولكم أحدث الأخبار مساء السبت من ميونخ..
كنت منتظر نتائج التحاليل زي ما قلتلكم في آخر خبر كتبته عن أنغام..
الحمد لله الأرقام تقترب جدا من الأرقام الطبيعية.. ونصح الأطباء أنغام بالمشي خارج غرفتها.. وهي الحمد لله بتاكل بشكل طبيعي..
الكلام عن وجود خراج على البنكرياس غير صحيح إطلاقا.. ولم يحدث أي خطأ طبي في العملية.. والمضاعفات اللي حصلت هي المضاعفات اللي ممكن تحصل في النوع ده من الجراحات الكبيرة والخطيرة..
وزي ما قلتلكم أنغام اختارت المستشفى دي لأنها متخصصة في الجراحات الخاصة بالبنكرياس..
كمان أنغام لم تخضع لـ3 عمليات جراحية زي ما أشيع..
وأخيرا بالنسبة للألم الحمد لله دلوقتي في تراجع.
عايز أقولكم إن المحنة اللي مرت بيها أنغام كشفت عن حالة حب حقيقية في منتهى القوة والصدق.. وهي تستحق ده..
أنا أعرف أنغام من سنين طويلة وعارف هي تعبت وشقيت قد إيه علشان توصل للي هي فيه.. فحبكم الصادق جدا هو لفنانة صادقة جدا.. وتستحقه..
دعواتكم بقى علشان تقوم بالسلامة وتعبر رحلة الألم والحب.