بعد أزمته الأخيرة.. نصيحة من أحمد فهمي إلى السقا: متردش واشتغل
تحدث الفنان أحمد فهمي، عن النصيحة التي وجهها إلى الفنان أحمد السقا، بعد أزمته الأخيرة بسبب بعض المنشورات على مواقع التواصل الاجتماعي.
وقال خلال تصريحات لبرنامج «et بالعربي»، مساء الجمعة، إنه نصح السقا بعدم الرد على مواقع التواصل الاجتماعي، والتركيز على أعماله الفنية فقط.
وأشار إلى أنه كان يتعامل بأريحية كبيرة على مواقع التواصل الاجتماعي عندما أنشأ حسابات خاصة به عليها عام 2019، لكنه اكتشف أن الرد على التعليقات لا ينتهي.
وأضاف: «أول ما دخلت كنت برُد، ما أنا مش فاهم؛ أخش أشتم وأقول اللي أنا عايزه، بعدين لاقيت الموضوع مبيخلصش، دلوقتي بقيت شاري دماغي، قول اللي أنت عايزه في الآخر أنا بعمل شغلي وبينزل، وحياتي الشخصية دي بتاعتي، وده قلته لأحمد السقا كتير».
ووصف السقا بأنه «إنسان طيب للغاية»، مضيفًا: «من الناس اللي بجد جدع جدًا؛ جدعنة وطيبة مبالغ فيها، هو طفل صغير معندوش نظرية إنه يعمل حاجة عشان حاجة تحصل، طول الوقت بكلمه، وبقول له ديمًا متردش واشتغل»، بحسب وصفه.
وتحدث بشكل عام عن طرح المشكلات على مواقع التواصل الاجتماعي، بقوله: «أي حوارات شخصية لو أنت طرحتها على السوشيال ميديا وبدأت ترد وتتكلم يبقى أنت أصلا مش نجم، ومعندكش ثقة في نفسك، يبقى أنت بتدور على التريند من خلال شخص تاني غيرك».
