أحمد حلمي عن عودته للمسرح بـ«ميمو»: كنت مرعوب من مواجهة الجمهور
أعرب احمد حلمى عن سعادته الكبيرة بالنجاح الذي حققه عرضه المسرحي "ميمو"، الذي تعاون خلاله مع الفنانة هنا الزاهد، كاشفًا كواليس تحضيرات العمل.
وقال أحمد حلمي، في لقائه مع برنامج "ET بالعربي": الواحد في العيد دايمًا بيبقى عنده فيلم في السينما إنما الوضع مختلف السنة دي، الحقيقة أن مسرحية ميمو كان أول عرض لها في السعودية روحنا بيها في جدة والرياض والدمام وبعدين الطائف ولاقت نجاحا الحمد لله حلو جدًا.
وأضاف حلمي: "أنا فعلًا من وقت مسرحية حكيم عيون لغاية النهاردة المسرح خد منحنى وقرب إلى الانقراض، وبدأ يرجع تاني في الكام سنة اللي فاتوا وبدأ يبقى فيه إقبال جماهيري، الناس بتحب المسرح واللي اختلف دلوقتي عن زمان التقنيات الحديثة والشكل المختلف وبقينا ممكن نتفرج على حاجات من الخدع اللي بتحصل في السينما جوا المسرح، فأتمنى نوصل إلى المستوى العالمي ده لأن ده الإبهار، لأن المسرح مش بس ضحك، المسرح ضحك وإبهار".
وأكمل أحمد حلمي: "اشتغلنا كوميديا مغلفة في رسالة المسرحية عن استخدام السوشيال ميديا، والفكرة دي جت أن أشرك الجمهور معايا في القرار، والقرار ده مش قرار درامي جوا رواية إذا كان البطل يسرق ولا يتوب، ده قرار أنا رميته في ملعبهم لأن في جزء منهم محتار في حياته زي حيرة البطل اللي هو استخدام السوشيال ميديا في حياتنا، والتصويت اللي بيحصل في الصالة مش حاجة ثابتة".
وعن تفاصيل تحضيرات العمل، برفقة المستشار تركي آل الشيخ، وعودته للمسرح مرة أخرى بعد 23 عاما، فعلق أحمد حلمي، قائلًا: المستشار تركي آل الشيخ، قالي المسرحية 10 أيام، أنا أعرف أن المسرحية 5 أيام مثلًا لكن 10 إزاي، وقالي اسمع الكلام وهنعرض في المسرح الكبير، وأنا أترعبت وكنت خايف من مواجهة الجمهور وجه لوجه، أو أن الجمهور ميجيش أو يجي أول يوم وميجيش تاني يوم، وبعد العرض قالي شوفت قولتلك، وطلعنا عملنا جولة السعودية وعرضنا حوالي 30 يوما في السعودية، وطلبت منه أعرض في مصر، وطبعًا رحب جدًا وبيطمن كل شوية أخبار الجمهور إيه
