قصواء الخلالى: لسنا دعاة حرب.. احنا بندافع عن سلامة وأمن واستقرار بلدنا
قالت الإعلامية قصواء الخلالي، إن الدولة المصرية تتابع الموقف في رفح الفلسطينية، وجاهزون لكل السيناريوهات، مضيفة:"إذا كنت تتحدث عن أى سيناريو خاص بالتهجير اللى رئيس الجمهورية وقيادة مصر قالت إنه مرفوض أى تصور اخر ردا على كل الهراء بتاع حكومة نتنياهو واليمين المتطرف وإن مصر هي اللى غلطانة وهيهجروا بالعافية، ويقولوا هنشوفلهم مكان في سيناء وهنحرك الجحافل العسكرية بتاعتنا على الأرض علشان تهجر الفلسطينين وهنشوف ممر أمن نوديهم في شمال غزة، كل الكلام الفاضى والغريب اللى بيتقال رده بيختصر في خطاب الدولة المصرية وهو "جاهزين لكل السيناريوهات" ، هذا هو مستوى الخطاب الحالي للدولة المصرية.
أضافت "الخلالى" خلال "المساء مع قصواء": "كنا بنتكلم عن الهدنة والتهدئة والكيان الصهيوني يحيل المعركة من مواجهة الشعب الفلسطيني ويبيده ويجرى وراء حماس ومش عارف يمسكها، لمرحلة الاشتباك مع الكبير، ويدخل الخناقة مع مصر ..لكن تصريحات الدولة المصرية على قدر الحدث، يعني تقول إننا ملتزمين على كل الأصعدة، لكن جاهزين لكل السيناريوهات، إنت هتلوى ذراع مصر بالعافية؟ إنت كده بتشتبك مع مصر، ومعاهدة السلام تنص على الالتزام المتبادل".
واصلت: "بيقول ان مصر ضليعة في 7 أكتوبر .. بيتكلم إن مصر أضرت أمنهم القومي، وردت مصر قالت روح شوف مشاكلك الداخلية وخيبتك الأمنية والعسكرية والاستخباراتية..الصوت اللى طالع من إسرائيل بيلوح بالإضرار بالأمن القومي المصري ونتنياهو يؤكد يوميا على تهجير الفلسطينيين قسريا من رفح ..طيب هتوديهم فين؟. وانت بتتغط لاقصى درجة علشان توصل الناس إنها تتحرك للحدود المصرية عنوة، هل يتوقع أحد إن مصر تضرب الفلسطينين؟ لا..مش هتشبتك مع الأعزل ، ولكن هشتبك مع اللى قهروا ووصلوا لهذا الدرجة .. والحربين العالميتين اندلعت لابسط درجة.
أكدت: "لسنا دعاة حرب واحنا بلد ندافع عن سلامنا وامننا واستقرارنا ولا نؤذي جيراننا وندعم المؤسسات الوطنية لجيراننا ونبحث عن بناء مصر داخليا وليس الاشتباك عسكريا على كل الأصعدة دم قلب المصريين اتحط مليارات في تقوية الجيش المصري علشان ميبقاش كل من هب ودب عنده القدرة في التطاول عليا".
