بوابة الدولة
السبت 21 نوفمبر 2026 11:59 مـ 10 جمادى آخر 1448 هـ
رئيس مجلس الإدارة ورئيس التحريرصالح شلبي
مستشار التحريرمحمود نفادي
بوابة الدولة الاخبارية
اندلاع حريق في سيارة أمام كوبري الأربعين بمدينة أسيوط رئاسة مركز فاقوس تواصل جهودها الميدانية لتنظيم حركة التوك توك وضبط المخالفات صحة الشرقية نجاح مستشفى فاقوس فى إنقاذ طفلة ناقصة النمو شريف فتحي يتسلم الدرع الفخري للآثاريين العرب لعام 2026 الجيش اليمني: تنفيذ 816 عملية عسكرية خلال 24 ساعة ضد الحوثيين ومقتل وإصابة 149 من عناصر الجماعة وزير الشباب والرياضة ينعى شادي جميل الشريف المدير الفني للتايكوندو في الشمس لاتسيو يعزز صدارته للدوري الإيطالي بفوزه على ليتشي من استرداد الآثار إلى الذكاء الاصطناعي.. شريف فتحي يستعرض ملامح تطوير القطاع الأثري في مصر ألافيس يفوز على ديبورتيفو لاكورونيا 3-1 في الدوري الإسباني استغل تعثر بايرن.. دورتموند ينقض على صدارة الدوري الألماني بالفوز على مونشنجلادباخ «رجال طائرة الأهلي» يفوز على 6 أكتوبر في دوري السوبر وزير الخارجية يشارك في مائدة مستديرة حول بناء السلام المستدام في منطقة البحيرات العظمى بمنتدى أسوان

الشاعرة شيماء غريب تكتب .. بشتري أرض

الشاعرة -شيماء غريب 
الشاعرة -شيماء غريب 

أنا طالبة حتة أرض أزرعها حنية
بالطيبة والجدعنة والحب مروية
فيها الطيور بتسبح الصبح في البدرية
ينزل نخيل البلح بضلته عليا
صوت السواقي يغني أحلاها أغنية

أنا عايزة حتة أرض مفهاش مكان لنفاق
أزرع بقلبي مبادئ تتحسن الأخلاق
يوم الحصاد والجمع تطرح غرام وأشواق
كل الخلايق تشهد بعظمة الرزاق.

أنا عايزة حتة أرض مش داخلة في التقسيم
عشان نكون ايد واحدة والله معين وكريم
لو يوم زرعنا الصبر الجبر يبقي عظيم
وإن ضاقت الدنيا في سماها رب رحيم.

أنا عايزة حتة أرض تورثها أحفادي
تطرح سنابل دهب تنثرها بالوادي
والعندليب في الراديو ما أحلاكي يا بلادي.
والشيخ محمد رفعت ضبطاله أنا ميعادي

أنا عايزة حتة أرض تكون غنية وخصبة

مليانة بالأحباب ويوزعوا محبة

كل الصبايا هناك كل الوجوه شابة

ويرجع اللي مسافر كفاية بقي غربة

أنا عايزة حتة أرض بستانها تفاحي

ضحكتها فلاحي

سهرتها صباحي

تنبتلي أفراحي

فيها النسيم صاحي
أنا عايزة حتة أرض مروية بالتقاليد
أشم فيها الخير اللي جفانا بعيد

نرجع نهني جيرانا ويبقي عيدنا سعيد

الجدة قاعدة تصلي والجد في حجره حفيد

الشمس تسطع تاني ونحس يومنا جديد


أنا عايزة حتة أرض فيها الجميع ناجح

ويرجع التعليم وكأنه امبارح

لا اشوف طالب مهموم ولا معلم سارح

والنسر يرجع تاني ضد العدو جارح

أنا عايزة حتة أرض هفرشها بملامحي

بسماري القمحي

لو طلبت الروح أفديها بجوارحي
أنا عايزة حتة أرض والله أنا شارية

ياأهل الغرام والطيبة دلوني أنا ناوية

مسبش فيها حزين في شبر أو زاوية

الزرع ده لعبتي وتملي ليه غاوية
بس أنتوا جيبوا الأرض... أنا عايزة حتة أرض

ياأهل الأمان والخير دلوني أنا ناوية.