في عيد ميلاد تامر حسني.. معاناته منذ صغره ودخوله مجال التنمية البشرية… صور

يحتفل اليوم الثلاثاء النجم تامر حسنى بذكرى ميلاده بعد أن وصل إلى مرحلة مميزة من النجومية ولقبه جمهوره بلقب "نجم الجيل" حيث قدم تامر مسيرة فنية تنوعت من الغناء والتمثيل والاستعراض.

وخلال التقرير التالي نرصد كيف وصل تامر حسني إلى أن أصبح النجم الشامل ومتعدد المواهب الفنية إلى أن أصبح ملهما للجيل الشباب ومؤخرا بدأ اعطاء الشباب نصائح تحفيذية بعيدا عن الغناء يحرص من خلالها في الحديث مع جمهوره ومنحهم خلاصة تجربته، مع تخصيص جزء من وقته لهذا الأمر عبر حساباته الرسمية على مواقع التواصل الاجتماعي.

تلك الفرصة التي سمحت لتامر حسني أن يكشف لجمهوره عن معاناته الشديدة وهو صغير، حيث كان وقتها يحلم بأن يكون لاعب كرة أو مطربا، وهو ما جعله ينصح متابعيه دائما بوضع خطة بديلة في حال لم تنجح الخطة الرئيسية. ليطلق عليه جمهوره أنه أصبح خبير تنمية بشرية.

-بطلع طوب وأسمنت وعامل فى بنزينة..تامر حسنى يروى معاناته مع حلمه الضائع

وكتب تامر حسني منشورا عبر حسابه الرسمي بموقع التواصل الاجتماعي فيسبوك، وإذ قال فيه: «قرأت معظم التعليقات على قد ما قدرت على آخر بوست ليا اللي تحت ده، وفهمت أكتر حاجتين من تعليقاتهم عاملين إحباط لمعظمكم، أولًا اليأس من النجاح وثانيًا إحباط المقربين».

وأضاف حسني: «بعضكم واصل لفقدان الأمل والشغف وبعضكم فاقد الأمل في الحياة نفسها، هطلب طلب منكم قبل أي شيء افتكروا معاناتي في بدايتي وظروفي الصعبة من غير أب ومن غير أي فلوس وبنزل أشتغل في الشوارع من عامل بنزينه لسوبر ماركت لفاعل، يعني اللي بيبنوا العمارات بطلع طوب وأسمنت، عشان أرجع بيتي لأمي الغلبانة بأي خمسة جنيه، بالإضافة لمرتب النادي لما كنت بلعب كورة، وكان مرتبي 22 جنيه في الشهر منهم بقى تحويشة المياه والكهرباء وعمليات أخويا، عشان كان عيان لفترة كبيرة، كنت بعمل المستحيل فعلًا عشان أمي وأخويا وعشان أوصل لهدفي».

وتابع: «كان جوايا سعي دائم لطريقين الكورة والغناء، وبقول ده عشان ناس كتير عايز أنصحها بالخطة البديلة، عشان لو الحلم مجاش يكون في غيره زي ما أنا كان نفسي أبقى لاعب كورة، والكورة مش ليا، والأندية كلها مشوني، رغم تفوقي كنت بسأل نفسي ليه الأبواب كلها بتتقفل في وشي أتاريها بتتقفل عشان توجهني لمسار آخر، ولما آمنت بكده فهمت قدام إن ربنا كان شايلي الأحسن ليا بس ساعتها مكنتش فاهم».

وواصل: «اللي بيسأل نفسه دلوقتي يعني أنا أكمل في حلمي ولا أشوف حلم تاني، هقول له دايمًا اطلب من ربنا يساعدك هتلاقي علامات بتجيلك بس الشاطر اللي يفهمها، علامات هتأكد لك تكمل أو لا بس اجتهد واتعب عشان المجهود ده لي كرم متحوشلك في مجالك التاني فـ اوعى تقول تعبت على الفاضى».

واختتم تامر حسني حديثه: بالنسبة للمحبطين هيفضلوا موجودين أنت اللي بتسمعلهم وأنت اللي بتسمح أنك تتأثر بيهم امنع ده فورًا، متبقاش السبب في أذية نفسك متتشدش غير لكل جميل ولكل إيجابي هتلاقي كل الحلو بيجيلك ومتعملش العكس عشان هيجيلك برضو، عشان كده بقولك أنت السبب دايمًا قول يارب واجتهد وافهم أن الراحة المطلقة في الجنة بس، وإحنا على الأرض، وربنا قال إنه خلقنا في كبد يعني شقاء عشان يكون عندنا تحدي نكسبه ولازم نكسبه، عشان كتير قبلينا كانت ظروفهم أصعب ووصلوا يبقى الموضوع فينا، متبقاش أكبر عدو لنفسك، أنت السبب، خد قرار صارم فورًا في التغير والنهوض والنجاح، والله هتوصل متسمعش غير لقلبك وسلم قلبك للّي خلقه وتوكل على الله.

لتحفيزهم على النجاح.. تامر حسني يعلن عن مشاركة جمهوره بتجربته فى الحياة

وسيق هذا وأعلن تامر حسنى ، عن مشاركة جمهوره بـ تجربته ومشواره وخبرته فى الحياة لـ إفادتهم وتحفيزهم على النجاح.

وكتب تامر حسنى عبر فيسبوك "حبايب قلبي في حب ربنا و حبكم ان شاء الله كل كام يوم هاجي على بالليل كدا نتناقش في موضوع من خلال مشواري و تجربتي في الحياة، جايز تستفيدوا منه حاجة وجايز يكون في كتير منكوا هيكون كلامي بمثابة إشارة تشجعهم كانوا مستنيينها.

وتابع “ من خلال خبرتي النجاح بيقوي و يجعل كل من حولك يهتم بك و العكس صحيح و اعني بالنجاح النجاح الانساني في علاقاتك بربنا و الناس .. النجاح المهني و تحقيق ذاتك و طموحك و تحديك لكل الصعاب و تخطيك لكل محنك زي ما عملوا كتير قبلك و ظروفهم كانت اصعب منك و وصلوا لاكبر من احلامهم ”.

وأضاف " امانه عليكم محدش يكتبلي عاش و هو دا و تقبر قلبي ???? انا عايز افتح باب نقاش حقيقي يخليكوا تاخدوا قرارات مهمه في حياتكم او تتشجعوا و تتحمسوا لخطوات ايجابيه .

واختتم تامر " اتكلموا و قولوا اللي جواكم تفريغ احاسيسكم هنا و اي اسأله جواكم او اي مواقف او حكايات لما تتقال هنا هتبقى اول خطوه للصح عشان هتتولّد طاقه كبيره للخير شاهد عليها ربنا ف هتكون خير اوي لينا ان شاء الله ".

ربنا خلقنا عشان نساعد بعض.. تامر حسني يدعم مرضى ضمور العضلات

نشر الفنان تامر حسني تعليقا عبر حسابه على موقع التواصل الاجتماعى انستجرام يرد فيه على المذيع حسين الجوهرى والذى طالبه بدعم مزاد علاج ضمور العضلات.

وقال تامر حسنى : "يا حسين يا حبيبي انا معاك و بدعمك و بدعم حملتك الإنسانية السامية وسلامي لصديقي و حبيبي استاذ خيري رمضان وعندي فكره أتمنى رعايتها ودعمها من اجل كل مريض فكره مش هتخلي مريض واحد في مصر يمد ايده لحد.

وأضاف تامر حسنى : "لو مليون مصري اشترك فيها هنحل ازمة الامراض المكلفه في مصر كلها، مليون مصري بس من ال ١٢٠ مليون مصري هيتطوعوا على حساب معين للتبرع و هيكون في لجنه مسؤولة من جهه رسميه مسؤولة في الدوله بتقيم الحاله مادياً و المليون مشترك دول هيكونوا بيتبرعوا بشكل دائم كزكاة عنهم و عن اولادهم لخدمة مجتمع كامل و ممكن نسميها مثلاً صفحة المليون أخ.

تامر حسني في رسالة للشباب: مهما كانت الصعاب أنت لازم تبقى بطل قصة حياتك

أعرب الفنان تامر حسني عن سعادته بسبب استعانة بعض الطلاب بأغنية له في مشروع التخرج الخاص بهم، موضحا أنه في التجهيز للأغنية كان ينوي أن تصل إلى إحساس الناس.

ونشر تامر حسني فيديو عبر حسابه الشخصي على موقع التواصل الاجتماعي «إنستجرام» يظهر خلاله مجموعة من الطلبة أثناء عرض مشروع تخرجهم وفي الخلفية أغنية «الموضوع فيك».

وعلق تامر على الفيديو قائلا: «فرحة عمري لما شباب عظيم من شباب مصر الواعد يستوحي مشروع تخرجه أو يقتدي بأغنيه ليا زي الموضوع فيك أو مش تمثال أو قد التحدي».

وأضاف تامر حسني: «والله والله وأنا بعمل الأغاني دي كانت دي نيتي أنها تتحس ويتعمل بيها مش تتسمع بس، والحمدلله اللي طلبته من ربنا حصل، عشان اللي بيطلع من القلب بيوصل للقلب».
وتابع: «مبروك شباب مصر العظيم، يارب حياة جديدة كلها خير ونجاح وطموح لا ينقطع، ربنا يفرح أهاليكم بيكم، أنتوا أملنا وأنتوا النماذج المشرفة الحقيقية».

وأكد: «الحقيقة اتطلب مني كلمة أقولها للشباب اللي بيتخرجوا، بس أنا كدا كدا كنت هكتب لكل شبابنا مش اللي بيتخرج بس بكتب لينا كلنا، اكتروا وخلوا أيديكم في أيد بعض، هفضل أقولها مفيش حل غير أنك تنجح، لما بتنجح كل الناس بتقدرك واللي مكانش فاهمك ومصدقك بيصدقك وبيحترمك، لما بتنجح بتبقى قوي ومرغوب فيك، لما بتنجح ربنا بيحبك وبيستخدمك عشان تنفع غيرك».
تامر حسنى فى رسالة لمتابعيه: كل فترة هعرفكوا معلومة جديدة ما حدش يعرفها عنى

حرص النجم تامر حسنى، مشاركة متابعيه بمعلومة جديدة عنه، عبر حسابه على إنستجرام، وكتب تامر قائلا:" كل فتره هعرفكوا معلومة جديده يمكن محدش يعرفها عني، انا كل يوم قبل النوم عندي رحلة قراءة ومعرفه جميله جداً ، يمكن أول مرة أعلن عن شيء بداخلي بالشكل دا ، بس حسيت فجأة أن واجب عليا انقلكم اي شيء بيفيدني عشان يفيدكوا معايا".

وتابع:" أتمنى من كل متابعيني الاهتمام و البحث و الحفاظ على كل فيديوهات ناس صعب تتكرر تاني أتمني من كل قلبي متابعتهم و لما نحتاج ردود على أسأله جوانا ندخل و نعرف قالوا ايه فيه الشيخ محمد متولي الشعراوي و العالِم مصطفى محمود و الدكتور إبراهيم الفقي والداعية مصطفى حسني والأستاذ أحمد الشقيري والشيخ عمرعبد الكافي والدكتورمحمد النابلسي وغيرهم".

وأَضاف:" و مازلت ابحث عن علماء تانيين بيوصلولنا حقيقة الحياة و أسرارها و كيفية التعامل معها في حلوها ومرها بشكل ايجابي جميل و بسيط".

تامر حسني لجمهوره: أي حد قرأ معلومة في كتاب يكتبها عشان نستفيد من بعض

شارك الفنان تامر حسني جمهوره بعادة يفعلها يوميا، وهي القراءة لعدد من الشيوخ والكتاب.

وكتب تامر حسني عبر صفحته بموقع التواصل الاجتماعي Facebook: "بخصوص بوست العلماء اللي نشرته إمبارح، أنا والله والله طاير من الفرحة بسبب حسن استقبالكم له، علشان كذا حد قالي ماكتبش الكلام دا عشان المفروض إني أتكلم معاكم عن شغلي الفني بس".

وأضاف تامر حسني: "أنا شايف أن شغلي معاكم مش فني بس بل مؤخرا بقيت أحس أنه إنساني أولاً والفني ثانياً وتأكدت من كدا بعد قراءتي لتعليقاتكم اللي تشرح القلب وعرفتني إني صح وإن رغم صعوبة زمنا اللي الهلس فيه بقى ليه جمهوره ومريدينه لكن الكلمة الصادقة والمؤثرة ما زالت لها جمهورها وموريدينها حتى لو فيهم ناس هما هما اللي بيهتموا بالجانبين عادي".

وتابع: "الإنسان مننا جواه الاتجاهين بشكل نسبي المهم هو هينمي مين فيهم ويهتم بيه أكتر زي البذرة الجميلة اللي بكرا هتكبر وتبقى شجرة مثمرة له ولكل من حوله، هعمل معاكم فكرة جميلة أي حد فيكم قرأ كتاب وحب أهدافه أو سمع معلومة أو مقولة عجبته ياريت يكتبها هنا ونعتبر إننا عندنا كل فترة قاعدة نفكر فيها ونستفيد كلنا من بعض جايز كلنا لما نتجمع على منفعة الناس ربنا يعزنا أكتر وينور طريقنا أكتر".

واختتم تامرحسني حديثه قائلا: "يعني زي ما طلبتوا مني أنكم تتعرفوا على حاجة جوايا شخصية زي بقرأ لمين أو بتابع مين أنا كمان أحب أعرف في نقط صغيرة ما تعلمتوه من أي كتاب أو قصة أو موقف شخصي أو مقولة مفضلة أنا عن نفسي أحب أن أنشر هذا المعنى وأتمنى أن يوصل للدنيا كله".