لقاء الخميسي: إحنا محتاجين إعادة إصلاح وتهذيب للنفس
قامت الفنانة لقاء الخميسي بإعادة نشر تعليق أتى لها عبر صفحتها الرسمية على تطبيق فيسبوك بعد أن دعمت أمس جول نادي الاتحاد الذي تعرض لمضايقة شرسة من الجماهير قام بسببها بترك الملعب وخرج باكيا.
كتبت الخميسي في منشورها: "في صديق للصفحة كتب تعليق رائع: "إنما الأُمم الأخلاق ما بقيت، فإن ذهبت أخلاقهم ذهبوا".. للأسف الأخلاق بقت بدعة وبقى الطبيعي اختلاق المؤمرات والكذب والإدعاءات الباطلة وأياً ما يكون يفترض افتراضات من عقله المبدع اللي صورله أشياء يعلم الله وحده من اي مكان بدأت وسوف تنتهي !
أي حد يحب يقول أي حاجة وهو ولا فاهم فيها ولا عنده اثباتاته يطلع ينور ساحة الحياة ويدعي بالباطل على أي حد لمجرد إشفاء غليله وأحقاده اللي كانت نتيجة فشله في إثبات ذاته ونجاحه.. فيقرر أنه يشبع إحساسه الداخلي بالضعف والفقر الإنساني والعملي ويتهم الآخرين بالسوء..لنا الله فعلا ..إحنا محتاجين إعادة إصلاح وتهذيب للنفس .
وكانت كتبت لقاء تعليقا أمس دعمت فيه حارس نادي الاتحاد السكندري قائلة :"الحقيقة أن الواحد ساكت بقاله سنين بس اللي حصل انهارده لا يسكت عليه!
الأخلاق راحت فين ؟! الإنسانية راحت فين؟ إيه بجد اللي حصل للناس ؟!
مشهد بائس ومخيف ولا يمت للإنسانية بصلة.
أحمد يحيي حارس مرمى الاتحاد السكندري.. حارس مرمى مثابر ومجتهد وإنسان خلوق وشاب في بدايات مستقبله، اتوفى أخوه من يومين ونزل الملعب ولعب ووقف وصد وعمل اللي عليه كله والأخطاء ماتخصوش وحتى لو تخصو ودا مش حاصل!
ليه الإهانات ليه الشتيمة ليه التعدي بألفاظ خارجة ليه كل دا.. ياعالم دي رياضة رياضة مش خناقة ما بين بلطجية دى متعة مش تعنيف!
إيه بقى إمتى هاتفهم إن لاعب الكره بني آدم بيؤدي شغله وبيحس وبيحلم وعنده أهل بيزعلو أما بيتهان وهما يتهانو معاه وعنده أم بتزعل وزوجة بتتجرح على جرحه.
كفاية بقى كفاية تكرهوا الناس في عيشتهم وشغلهم اللي بيبذلوا فيه مجهود وبيحبوه.
ماحدش ليه حق مطلق في الشتيمة والإهانة..
أي حد بيشتم هل يقبل إنه يتشتم ويتهان !!!
هل تقبل دا عليك وعلى أهل بيتك.
اتقوا الله بقى اتقوا الله....!!!
لقاء الخميسي في منشورها