بسبوسه الحلوانى...مع الشيف «أحمد فؤاد»
بسبوسة الحلوانى بقوامها وطعمها هي المقياس للبسبوسة الناجحة، فليست كل وصفة تعطيك نفس النتيجة، بس من النادر وجود وصفة الحلواني الصحيحة والمضبوطة، اليوم نطلعك على سر هذه الوصفة وبالمقادير الأساسية بالسمن البلدي وجوز الهند تعرفي على طريقة عمل البسبوسة زي الحلواني طرية ومرملة خطوة خطوة.
بسبوسه الحلوانى
المقادير :
٢ كوب سميد ناعم
نص كوب لبن
معلقه كبيره عسل نحل او عسل جلوكوز او شربات حلويات
٢ معلقه كبيره جوز هند (اختياري)
كوب الا ربع سكر
نص كوب سمنه او زبده
الطريقه :
هنحط السكر و العسل و اللبن الدافى و نخلطهم كويس اوووي و في بوله تانيه هنحط السميد و جوز الهند و نخلطهم و ننزل عليهم بالسمنه و نخلطهم كويس نخلي السمنه تغلف السميد كويس و بعدين ننزل بالخليط التاني بتاع اللبن كويس و نقلب براحه جدا مجرد ما تتخلط يبقي كده خلاص بلاش نعجن كتير عشان متنشفش و نكون دهنين الصنيه سمنه و نحط الخليط و نفردة كويس و نخبط الصنيه كام خبطه كده عشان تبقي متساويه و ندخلها فرن سخن على ١٨٠ لحد لما تاخد لون دهبي من الجناب نشغل الشوايه تاخد لون اول لما تخرخ نحط الشربات و هي سخنه
الصينيه المستخدمه مقاس ٢٦
الشربات او السيرب؛
كوب سكر
٢ كوب ماء
معلقه كبيره سمنه
رشه فانيليا
الطريقه :
نقوم بوضع السكر و الميه و ندوبهم شويه قبل ما نرفعهم على النار و نقلب من النص بس عشان ميسكرش و نرفعو على النار و تكون وسط و اول لما يغلي نسيبو ٥ دقايق و بعدين نرفعو من على النار و نحط السمنه و الفانيلا و نقوم بوضع الشربات علطول على البسبوسه عشان لازم يبقى هو سخن و البسبوسه سخنه عند خروجها من الفرن وتترك حتى يتشرب الشربات بأكمله بالهنا والشفا