الناشطة المجتمعية سمر سعيد تكتب.. يوم في حياة ام ريفية
واوووووووو... راجعين المدارس اخيرا، وحشتنا المدراس.(الام)... بجد يا ماما لا احنا هنصحى بدري وهنام بدرى ومفيش لعب ولا تليفزيون ولا تليفونات ومذاكره وامتحانات(الاولاد)
هنا نقطة لازم تقف عندها كل ام ليه اولادنا حاسين إن المدرسة حبس لحريتهم وان المذاكره عذاب .
الجواب ببساطة احنا السبب احنا صدرنا افكار سلبية لأولادنا بسبب طريقه تعاملنا معاهم فى أيام المدراس.
إن الاستعداد النفسى لأى خطوة نقوم بها فى حياتنا هو أمر أساسى وكذلك هو الحال بالنسبة لأولادنا و لعل الخطوة الأهم فى حياة أولادنا هى فترة دخول المدارس.
فى نقاط أساسية من وجه نظرى ممنوع التحدث فيها أمام الأولاد
1_ممنوع اقول أمامهم امتى المدراس تيجى عشان استريح منكم
2_ ممنوع تقولهم المدارس هتيجى تعلمكم الأدب .
3_ ممنوع اقولهم اول ما المدارس تيجى ممنوع اللعب أو التليفون أو اى هواية بيحبوها.
الموضوع ابسط من كده بكتييير.
احنا امهات احنا الأمان احنا الحضن إلى بيحميهم رسالتنا نحافظ عليهم نسعدهم نشوف ضحكتهم مش نعقدهم فى عيشتهم، اولادنا غير مسؤلين عن مشاكلنا وصراعاتنا الداخلية .
كل بيت فية قصة مليانة حزن وفرح وخلافات واتفاقات اختيارات سواء غلط او صح
اولادنا ملهمش ذنب .
حبوهم مهما كانت تربيتهم صعبة ومهما كانت مسؤليتهم وأدعو ربنا يهديهم ويساعدنا بلاش كلام جارح لهم وانتوا السبب فى مشاكلنا .واوعوا تقولوا تعبنا من أولادنا .
استمتعوا بالتعب الجميل بالصحيان بدرى والجرى وراهم عشان الشندوتشات والمصروف وحل الواجب وكل مشاكلهم اوعوا تقولوا امتى يكبروا ونرتاح خلى ليكى فى كل لحظة ذكريات معاهم هى دى إلى هاتبقى ليكى بكروا يكبروا وتتمنى لحظة وجودك وسطهم هى دى سنة الحياة.
تجربتي مع اولادى
عاملنا اجتماع كالمعتاد كل واحد قال طلباتة فضلنا نضحك ونتفق على حاجة ونرفض حاجة ونشوف الافضل والاوفر طبعا حسب إمكانياتنا ولو طلبوا حاجه مش فى إمكانيات اضحك وافهمهم واحكى ليهم حكايات عن طفولتى مع جدتهم وذكرياتى فى المدرسة وصحابى والمدرسين والمواقف إلى كانت بتحصلى بإيجابية .
واجمل لقطة وقت كل واحد عايز شاندوتشات اية والمصروف كام
اتفقنا هى جبنة فقط لسبب بسيط عشان أعلمهم مراعاة الشعور بالناس والإحساس إلى مفتقدينة .
وقلت لهم كمان على فكرة كل واحدة منهم مع زميلاتها يتفقوا يوم فى الأسبوع يعملوا غديوة زى ايامى طبعا محدش بيعمل كده دلوقتى كل ام تقول لأولادها كل وخلاص عشان أعلمهم يتعاونوا ويكونوا صدقات حقيقية .
من هم صغيرين مفهماهم أن المدرسة اجمل خروجة ومتعة والمدرسة اتعملت عشانا نخرج نشوف ناس نتعلم حاجات .
وعمرى ما خوفتهم من مدرس يضربكم و متابعاهم مع المدرسين ولو مدرس اتنرفز عليهم بفهمهم إن لكل شخص قدرة تحمل ويمكن هو تعبان أو عنده ظروف مش بيكرهكم انتوا أو مضايق منكم هو بيحبكم بس هو تعبان عشان يفضلوا يحبوه وفى احترام رغم انى بكون فى صراع مع نفسى عن اسلوبة .
عندى اتنين منظومة جديدة تانية ورابعة .
رابعة رابعة ؟؟؟
انا طبعا مع كل تطور وفخورة بتطور المنهج جدأ لانى مؤمنة اننا لازم نتقدم وذاكرتة .
منهج رابعة الناس عمالة تولول وتصوت علية مش فاهمة ليه
اه عشان مفيش مدرس مؤهل لتقديم المحتوى الاصلى من المنهج وعشان الفترة الماضية مكنش فية مدارس .
تماااام معاكم دورنا احنا فين
لازم نفوق احنا خلاص فى 2021 عصر التكنولوجيا لازم نطور من نفسنا ونحاول نتفاهم الوضع الجديد .
احنا فى صراع مع العالم كلة ولازم نبنى جيل فاهم مش حافظ جيل متعلم مثقف على فكره اقصد متعلم ومثقف فى مجالة بمعنى أن لكل إنسان موهبة خاصة نحاول ننميها ونكمل بعض .
المدرسين إلى عاملين يحبطوا فينا احنا فين .
انا كام روحت لمدرس سالتة هتدي ايه لبنتى فى العربى قالى المنهج قلتلة سلام عليكم.
كل إلى عملتة بعد ما تابعت المنهج أنى راجعت معاها قواعد النحو وعرفتها ايه مواطن الجمال و ازاى تكتب موضوع تعبير ومعلومات عامة من المنهج وبره المنهج على المنهج من نواتج التعليم وعرفتها أساسيات العلوم والدراسات والرياضيات دى متعة كأنها فزوره بنلعب ونفكر عشان نحلها لسه الدراسة الفعلية احنا فى اجازة.
اينعم هى مطلعة عينى والموضوع صعب لكن هاستمر وهى قدرتها
وبناتى فى الثانوى اولى وتانية اتكلمت معاهم عن التزامتهم مش من ناحية المذاكرة لا اخلاقهم وطريقه تعاملهم مع زملائهم ومدرسينهم وطريقة اختياراتهم لزملائهم ما هو لازم كل فترة نتكلم ونوعى ربنا يسترها على اولادنا جميعا فى هذا الزمن .
وطبعا تتكلموا عن أحلامهم وفهمتهم أنهم لازم يتعبوا ويتعبوا عشان يوصلوا.
اخر العنقود انا بتكلم وطالع عينى هو اهم حاجه هتجيبلى هدية ايه بمناسبة المدرسة
ما انا بجيبلهم كل واحد لعبة صغيرة بمناسبة المدرسة اه جنان عارفه وهم كل يوم وهم جايين من المدرسة بيجيبوا ليا شيكولاتة من مصروفهم.
لكن احنا بنقسم وقتنا بكرة الضغط .
انا بدعم المنظومة الجديدة لسبب أساسى أنة أعاد اداميتنا للحياة وبيغير طريقة تفكيرنا نجاة مستقبل أولادنا.
المدرسة مش عذاب المدرسة اجمل خروجة للاولاد .
اينعم بعانى مع المدرسين لكن مستمرة وهاحاول وهاحاول ولازم اولادى تكون ذكرياتهم جميلة عن ايام المدرسة.
ارضوا على اولادكم بكل حالاتهم ومستوياتهم واققوا معاهم وساعدهم ولو ضعيف فى مادة بلاش نقولة أنت غبى.
نوجة لطريق اخر يثبت نفسة فية ونحاول نتفهم مشكلتة.
انجبنا اولادنا كى نسعدهم ونسعد معاهم .
خليكم أبطال رواياتهم وعمرهم ما يتمنوا أب ولا أم غيركم فى قصصهم.
بتمنى من اللة أن يتم تطوير كليات التربية مش كل شخص مؤهل يكون معلم اجيأل لازم يكون مؤهل نفسيا لكى يقدم لنا اجيال صالحة متصالحة مع نفسها.
إن الأبناء أمانة ومسولية, يقول رسول الله علية افضل الصلاة والسلام
كلكم راع وكلكم مسئول عن رعيته .
كاتبة المقال الناشطة المجتمعية سمر سعيد