طريقه عمل حلو رموش الست .. مع الشيف أحمد فؤاد
"رموش الست" حلوى شرقية شهيرة محببة لكل أفراد الأسرة، لكن كثيرين يفضلون شراءها جاهزة معتقدين صعوبة عملها في البيت.. اليوم نقدم لكم طريقة عمل رموش الست مثل أشهر محلات الحلويات
طريقه عمل حلو رموش الست
المقادير :
١/٢ كوب سميد بسبوسه
١ كوب و ربع دقيق
١/٢ كوب زبدة
معلقتين كبار سكر مطحون
معلقتين كبار جوز هند ناعم
١ بيضة
١/٢ معلقة صغيرة فانيليا
١/٢ معلقة صغيرة بكينج باودر
١ معلقة كبيرة حليب
طريقة التحضير :
في طبق نضع الزبدة على السكر البودره ونضربهم كويس بمضرب يدوي او كهربائى لمدة ٤ دقائق لحد ما السكر يدوب خالص وبعدين نضيف البيضة والفانيليا ومعلقة الحليب ونضرب كويس لحد ما البيضه تختفي.
في طبق تاني ننخل الدقيق ونضيف معاه السميد وجوز الهند والبيكينج البودر و بعدين نضيفهم على خليط الزبدة و السكر البودرة و نحرك لحد ما العجينة تبقا متماسكة
نحط الخليط بدون عجن في كيس نضيف و ندخله التلاجة لمدة نصف ساعة
ناخد مقدار معلقة من العجينة و نكورها على شكل عين ونضغط عليها بالشوكة بالطول و العرض
وندهن الوجه بيض وحليب بالفرشاه
ندخلها فرن مسخن مسبقاً على درجة حرارة ١٨٠ لمدة ٢٥ دقيقه لحد ما لونها يبقى ذهبي
نخرجها و نسقيها شربات خفيف ونزينها بالفستق المفروم أو جوز الهند
.بالهنا والشفا