اراجوز .. للشاعر/ إبراهيم خليفة
-
اراجوز بيزهق في العمدة
والعمدة بيطلق في كلابه
ويقولوا محاسيب محاسيبه
ايش جابك انت علي بابه
مش كنت زمان بتغنيله
زينا محسوب و بتوفيله
قال جبت الديب من ذيله
قرب قلع للعمدة شرابه
انا اراجوز عندي كرامة
علمت عليكوا الف علامة
غورا مش ناقصة تلامة
عمدتكم تقل في حسابه
عمدتنا مسيطر والنعمة
وشيخ الجامع ابو عمة
عارفه محتكر الرحمة
هو كمان من حسابه
عمدتكم ده بلونه منفوخه
علاقتكم بالناس مشروخة
بكرة اكيد حتجلكم دوخة
ونفرح بعذابكم وعذابه
شايفين اراجوزنا خبيث الشكل
واقف يتحنجل علي رجل ورجل
كل ده علشان يوم منحط الاكل
معرفش ياخد هو منابه
انا اراجوز غاوي اترقص
واشغل عقلي واتفلحص
بمزاجي احسس واقرص
لجنابك وجنابك وجنابة