الاديبة والشاعرة شيماء غريب تكتب .. شـعبـان مـا تـغـادر
أنا وسط شعوب الدنيا اخترت في مصر يبقالي مكان..
لفيت علي كل شهور السنة نفسي فى عنوان
في ربيع ومحرم وجمادي وذو القعدة كمان
طوافة بلف وأعافر نفسي أنول إحسان
زورت أنا شعبان وحقيقي وبجد أمانة طالبة الرضوان
قررت أكون أنا فيه إستاهل إني أكون إنسان
شيلت الأحقاد... ونزعت الغل وصفيت قلبي
ومسحت أنا منه كل الألوان.....
رجعت بياضه صفاء التلج ولا كاره حد ولا ندمان
حتي اللي ظلمني وبكاني كان حسبي الله ونعم الحُسبان
بطلت أعاتب وألوم واكتب في مبرر بالكوم
وزرعت الرحمة عشان يزهر كل البستان
لملمت جراحي وأوجاعي ونسيتها وقلت مافيش داعي
ربنا رحمٰن.
كترت صيامي زودت علامي وفتحت كتاب في الجنة شفيع اسمه القرآن
وشحذت الهمة... عددت النعمة... ودعيت ربنا يرفع عملي وأنا فـ اعلي إيمان
رددت آمين وبكيت بالعين استرني يارب وقويني
وأحيينى لحد ما أصوم رمضان
مش فارقة معايا زمان قالوا إيه... ولا مين ضللني وعيشت أنا ليه... وبقيت بتنفس حلم كبير يفتحلي الجنة الملك رضوان
وسألت يميني سبحتي؟!
طلعتي كتير اتصدقتي؟!
كتري مـ الهمة يا شيماء دا الرب كريم عطاياه فيضان
ولا تبقي علي اللي خذلوكي... ولا تبكي في يوم عـ اللي باعوكي وسبيهم منهم لله وكفاية عليكى الريان
علقت القلب بمُحمد نفسي أشرب مـ الكوثر يانبينا انا ليك عطشان
وأزور الكعبة وعلي بابها أبكى وأتكلم وأقوله وجعوني يارب بس نصرتني ياصادق الوعد في كل آوان
و بزمزم أمسح علي راسي اشفيني يارب مـ الأمراض
أنا واللى تملي يقول الآه ويبات عيان.
وأكتبلي في الدنيا سعادة وميزني في قربك بعبادة أمشي واتباهي إني قريبة وأكون في الجنة من الأعيان.
شعبان شعبان... بالله ما تغادر وتسيبني إلا مـ تقول صامت قامت سامحت ساندت صلت فرضها اكتبها يارب من الفائزات ويهل عليه كمان رمضان