الشاعرة شيماء غريب تكتب .. ما تقول يا براح
-
يا براح مخنوق
محتاج أتنفس، نفسي أفوق
و كأن الأرض انقلبت فوق
أنا نفسي من النسماية أدوق
أنا نفسي أنام و غالبني الشوق
يا براح بهتان
أنا نفسي أحس إني أنا أنسان
ليه دايما شايف إن أنا مسجون و بشوف سجان
ليه لما تملي ارسم رسمة تطلع مش باينة بالألوان
كل العشاق سهروا ليالي إلا أنا نعسان
مطحون وفي ساقية بلف وأدور و ببات حيران
أنا نفسي يقولوا الواد عاشق الواد ولهان
يا براح ساكت
هو أنا علي حظي الليل خافت
بيقولوا معشوقتي كمان ماتت
ليه كل خطايا بتتجمد دأنا كنت بقول ماخلاص هانت
و شحنت الفون نفسي في رنة أتاريه صامت
يا براح مذكوم
طب قولي أعاتب مين و ألوم
قربت أشك إني أنا مكلوم
و أعاتب مين دول جابوا عليا ساعتها اللوم
بتقولي أحب... مبقاش فيه داعي ولا ليه لزوم
و أحكيلك إيه دنا كنت في بحر الحب بعوم
لكن أنت مصمم علي الأوجاع وتقول مقسوم
يا براح يا هزيل
ما تقوم يا جبل ما تشد الحيل
أنا بحلم أغني ياعيني ياليل
أنا نفسي في هجره أدوق الويل
و أعد نجومي و أقوله كلام الحب قليل
ليه سايبني عليل ليه سايبني عليل
يا براح مبقتش تساع أحباب
تعرف خليتني بقيت شاعر ألفت كتاب
تعرف من كتر ما بحسبها وصفوني خوارزمي الأحباب
لما أسمع صوتها وهي بتسأل هو صحيح الهوي غلاب
يسبقني حنيني ودموعي تجيني وأقول أغراب.
صعبان علي نفسي ونفسي ياما قابلها صعاب
شغلت نجاة شغلت حليم شغلت دياب
عرفوني في سوق الحب الوحداني المتساب
يا براح
يا براح
فين الأفراح..... بالله لتقولها .. هانت وارتاح
اديني حبيب دنا ياما عشانه مشيت سواح
و عشانه كتبت قصايد شعر وبقيت مداح
يا براح واسع واسع يا براح
قررت أصالحك يلا سماح.
ماهو بردوا العاشقين دايبين في حنين و عذاب
ومين فينا بس .. عايش مرتاح
