الشاعرة شيماء غريب تكتب : قربت أشك إن أنا إنسان بقلم /
-
يا بلاد الحُزن هو أنا فيكي لاجئ
ولا خلاص استوطنتك.
ليه كل ما أهاجر أعود تاني لسواد طينتك
مش قادر أنا أبدا والله علي شيلتك.....
يا بلاد الحُزن ماتخفي عليا بقي وعومي
ليه ماسكة في توبي ليه لازقة في كل هدومي
هو إنتي سعادتك في شقايا وغمي وفي همومي
يا بلاد الحزن قوليلي مشيتلك أنا كام ميل
بحسبهم أنا من يوم ما وعيت دول هدوا الحيل
فاكرة يا أحزان علشانك قلبي سهر كام ليل.
هي الأفراح دايما جافة أما إنتي في سيل
يا بلاد الحزن يا واخدة شبابي وقلتي دا شااب
دلوقتي الخصلة اللي في شعري مش للإعجاب
ماهو مين شيبها إلا خطاكي وقفلتي الباب
ترابيس جنازير وسيور وأقفال وميتين بواب
يا بلاد الحزن أنا اتعودت علي الأغراب
مبقاش فينا حيل لمناهدة ورغي وليه وعتاب
يا بلاد الحزن قربت أحكيكي كحدوتة
وازاي دوبتي البسكوتة
وازاي خليتي حياتي لبانة محطوطة في بوق البنوتة
ماهو عادي بقي منا هشة ضعيفة صغنتوتة.
يا بلاد الحزن عليّ في جدار الهم كمان
وابني علي انقاض عمري كل الأحزان
واعزفي ندم ... ودار يا دار... وكل الألحان
هاتي توبك الأسود وخليلك إنتي الألوان
قربت أشك إن أنا إنسان
قربت أنهار ولأول مرة أشوف بيتي من غير عمدان.
سفلتي في شوارع العمر ودوسي بالقطران
اعتبري الصبر دا ضيف وهيرحل هو كمان
هتقولي جنان..... فجنان بجنان
أنا ساكنة شوارعك أنا أقدم مستأجر فيكي بقالي زمان
يبقالي الحق إني أتنفس إني أتكلم
وأقولها بعلو الصوت
أقربت أشك إني أنا إنسان
