الشاعرة والاديبةشيماء غريب تكتب .. قسمت المطر
قسمت السطر أنا نصين و أقولت أسرح و أهيم حبة...
خيالي عريض وعندي كتير ماهو أصل الهموم زايدة
كتبت عتاب بكشف حساب مسحته تاني من تاني
لأن خلاص مفيش فايدة....
مليت السطر برقيات وأقولت أهني وأبارك ويرجع ودنا محبة...
دلقت الحبر 100 مرة قسمت يمين ما انا كاتبة
هاجمت اليأس بإستغفار قسمت السطر بالمنشار وحطيت عـ الحروف شَدة...
وبالفتحة وبالضمة وسوقت عليهم اللمة و بردوا مصيرهم الشطبة...
ناديت عـ الحروف بالصوت كأن الباء مصيرها الموت وحرف الحاء شفايفه سكوت وكلمة حب ليه غايبة
أنا لسه في عز العمر أنا دفاتري ليه شايبة
فـ لحظة ركبت أفكاري و روحت السوق ما انا شارية
حوار للبيع... حكم ومواعظ يا ناس فين الكلام ينباع
أنا عايزة عبارة من زمان نادرة....
لمحت الحزن في عيونهم... وردّ حكيم بيتنهد « دي عشمانة أووي الشابة»....
كلامه زلزل الأرض حواليا و لمعت ليه الدمعة فـ عنيا..
أنا سطري فارغ يا حكيم... رحم قلمي كأنه عقيم
في سوق الشعرا سموني الشاعرة الكاتبة...
اقولك سر... أنا حاسة الكلام عيان.. مفيش طعم.. مفيش ريحة.. مالوش فايدة...
فاكر يا حكيم كلامنا زمان... لكل مقال كان العنوان وكل مقام كان له كلام وبيتنا اصيل وليه ضبطة..
نسافر يبعتولنا وداع... بنرجع نلقي أهلا بيكوا في السكة....
وكان الحاج من دولا بيحمد ربه ميت مرة
راجع مـ الكعبة بيلاقي علي جدار بيته كعبة....
وكان ذنبه كمان مغفور وكان حجه كمان مبرور وكانوا يهللوا بفرحة ...
وكنت أغزل أنا شعري... وأنا بضفيرة طول شعري
وأقف وسط السطور و أقرا وحتي الكلمة مش صعبة
فين يا حكيم؟؟؟؟!
أوعي تقولي الغلط فيا... دنا حرفي بيبقي بدمي
و بدمعي و بإحساس صادق فيا...
أكيد غلطى لأني قسمت السطر مـ الأول وخليت الكلام طول و عاتبت وهنيت ولما اعتذروا أنا حنيت
ولما طلبوا إني أروح لهم جيت وطوفت ويا أفكاري وسبت البيت... أنا كان لازم أتأنى وخلي السطر يستني لحد ما يجي تاني زمان ويرجع للكلام معني
ونلقي تاني ناس واعية وناس بالكلمة معنية...
أنا نقشت علي توبى أصيل الكلمة...
أنا مروية في عروقي بعصير الكلمة
أنا مكتبش في سطورى هزيل الكلمة
أنا نفسي تعود يا حكيم.... ويبعد السفيه عنا....
أنا بحلم بناس شبهك تزيل بكلامها العتمة...
كلام بأصول... رسايل نور... وطاقة تمدنا بقوة
أنا نفسي الحروف تطلع متتكسرش أنا نفسي فـ وشوش مبتسمة متكشرش.. ماهو أصل الكلام صدقة
أنا بتمني لما أقرا ... مشوفش غموض ولا أحسها منافقة...
أنا عاوزة السطور صادقة....... ????