إزاي تلم المنهج كله في 3 أيام؟!
تبدأ فترة امتحانات التيرم الأول لجميع السنين العمرية بمراحلها المختلفة (إبتدائي – إعدادى – جامعة) فى نهاية شهر ديسمبر ماعدا طلبة الثانوية العامة الذين يجمعون منهج التيرمين لشهر6 بنهاية العام الدراسي, وكطبيعة الحال لمعظم الطلاب رافعين شعار "مش بنذاكر غير لما نتزنق".
فأغلب طلاب المراحل الجامعية وخصوصاً طلاب الكليات الأدبية التى لا تحتاج إلى جهد كبير فى المذاكرة والتى أغلب موادها تعتمد على الحفظ والمعلومات العامة لا يعتمدون على المذاكرة منذ بداية التيرم فمنهم من ينقذه الحظ بوجود إمتحانات نصف التيرم والتى تساعد قليلا على إستيعاب مايتضمنه المنهج من معلومات قبل تراكم المنهج لنهاية التيرم.
بعض الطلاب وأيضاً أساتذة ودكاترة المواد يتعجبون من الطلاب الذين ينجحون دون حضور أو إلتزام فى التسليمات المطلوبة ومنهم من يقول "الكتاب خد سنين لحد ماتكتب ويجي الطالب المصري يخلصة ويفهمة فى يومين".
إزاى تبقي بطل العالم فى لم المنهج ؟
شيل من دماغك طريقة الحفظ بتاعة زمان وإنسي مقولة “التكرار يعلم الشطّار” .. التكرار دقة قديمة دلوقتى فيه طريقة “الرابط الذهنى” ودى معناها إنك تربط معلومة قديمة عندك و حافظها كويس صم, بمعلومة جديدة, فتلزق فيها بسهولة و كل ما كان فيها إبداع, كل ما كان أحسن مثلا لو حابب تفتكر إن ارتفاع الكعبة المشرفة 14 متر (و دى المعلومة الجديدة عليك) , فممكن تتخيل فى ذهنك الكعبة , ليلة 14 هجرية , و القمر بدر بينورها .. (المعلومة القديمة : الكعبة و الهجرة و ليلة 14 حاجات ثابتة عندك من قبل كده) … و بكده عمرك ما هتنسى المعلومة.
لما تيجى تذاكر فضى دماغك من كل ما يشغلها يعنى لو عندك مشاكل سيبها ورا ظهرك وابعد عن السرير وقت المذاكرة خصوصاً قبل الإمتحان بأيام عشان " دى طريقة نوم بينصح بيها الأطباء كل من يعانى من الأرق أن يمسك كتاب ويمدد على السرير ".
ابدأ بالمادة اللى بتحبها "عشان تفتح نفسك" وبلاش الايحاءات السلبية "وماتصدقش كلام حد عن مادة إنها صعبة متسمعش كلامه يمكن انت اذكى منه وخلى عندك ثقة فى ربنا وفى نفسك ماتقولش أنا غبى أنا مش حقدر اخلص لوعندك ارادة هتنجح ياعني هتنجح وخليك فاكر حديث الرسول صلى الله عليه وسلم " لا تمارضوا فتمرضوا فتموتوا " يعنى لا تدعوا المرض فتمرضوا بالفعل ثم تموتوا وطبعا كلنا عارفين ان اكتر من نصف علاج المريض فى حالتة النفسية لابد أن تكون جيدة.
قسم الكتاب بتاعك لأجزاء مثلا لو هو 4 أبواب حدد وقت لكل باب تذاكره فيه ( كل باب ساعتين مثلا) بعد ما قسمت الكتاب وكتبت الخطة بتاعتك في الكشكول، خدلك «بريك» نص ساعة بقى قبل ما تبدأ، خلص الـ«بريك» ابدأ مذاكرة في الجزء الأول اختصر الجزء لعناصر في الكشكول، واشرح لنفسك بصوت عالي أي نقطة حاسس إنها مش داخلة دماغك بسهولة.. لو لسه مرخمة حاول تركبها على أغنية بتحبها. لو خلصت قبل الوقت اللي انت محدده ما يخلص خدلك «بريك» نص ساعة اعمل فيه أي حاجه انت بتحبها.. لو تجاوزت الوقت خدلك «بريك» ربع ساعة بس ولما تخلص جزء وتبدأ في اللي وراه، حاول تكلم نفسك بصوت مسموع لو ده جايب نتيجة معاك وتربط اللي بتقراه بالجزء اللي فات, الطريقة دي هتاخد من 8 لــ 12 ساعات.
إبدأ بحل الإمتحانات للسنين الماضية لكى تتعرف على أهم الأسئلة المكررة فى كل السنين الماضية وإبدأ بها المذاكرة, وحتى تتعرف على شكل الإمتحان ومما يتكون, وعشان تدور على الإجابة اكيد حتمر على صفحات لحد ماتوصل للإجابة بعد تانى امتحان حتلاقى نفسك بقيت بتوصل للإجابة بسهولة وأسرع وبعد خامس امتحان حتلاقى نفسك حفظت مكان الإجابة بل وحفظت اغلب الأسئلة المكررة وبعد ثامن أو عاشر امتحان حتلاقى نفسك حفظت 72 % من المنهج بكل سهولة بعد كام امتحان حتلاقى نفسك حفظت المنهج بالكامل. والتفسير: إن عينك ذى الكاميرا والمخ هارد ديسك بيخزن صورة دائمة واللى انا عملتة إنى أجبرت مخك على نقل المعلومات اللى بيعدى عليها بلا اهتمام ويضعها فى الجانب المظلم أجبرة ان يضعها فى الجانب المضيئ.
أما عن أسلوب المترو الاسلوب ده باختصار هو إنك تذاكر الكتاب كله ولكن بأسلوبين في وقت واحد، هتعمل زي المترو وتمشي بسرعة يعنى تقرأ بسرعة الحاجه سهلة الفهم بالنسبالك وتكتبها عناصر رئيسية بس في كشكول جديد، ولما يقابلك جزء مهم «محطة» لازم تقف وتديله حقه وتكتب عناصره بشرح مختصر لكل عنصر. خد بالك وانت ماشي سريع زي المترو لازم تكون العناصر اللي معدي عليها بسرعة دي في الأساس مفهومة ليك من غير شرح، والمحطات اللي بتقف فيها دي هي اللي عندك مشكلة معاها فلازم تكتب شرح لكل عنصر.
مايجب أن تدركه هو أنك الشخص الوحيد القادر على تحديد نقاط الضعف والقوة فى طريقة جمع المعلومات الموجودة فى المنهج الدراسي وكيفية إستراجعها بسهولة وكثرة هذه الطرق تُسهل لك ماهى الطريقة التى تُلائم نظامك الدراسي .
